鄭欣宜為慶祝明年4月成功入紙紅館騷，隨即飛到外地渡假，但她返港後，卻突然拍片放上社交網站，講述自己要入院做手術，而且更驚到眼紅紅，之後還邊講邊喊，我見猶憐，而不少網民更留言鼓勵為她打氣，並祝她手術成功。由於欣宜一直未有透露發生何事，令粉絲十分擔心欣宜情況，昨日欣宜在Facebook開Live，除了透露手術成功外，亦憶述自己發生意外的原因，讓一班粉絲可以鬆一口氣。

欣宜表示之前在病房內拍片，當時心情好驚好亂，「但我好樂觀，當你相信一件事嘅時候，有恆心就一定做得到，依家手術成功啦。」欣宜透露在慶祝獲得明年4月的紅館演唱會檔期後，所以去了外國渡假，「諗住返嚟香港就要修心準備演唱會，點知就係呢個旅程上面整親隻腳，其實係好蠢嘅一件事，自己又經驗淺。當時在水裡面，我以為水好深，我跳落去嘅時候，原來水好淺，隻腳一掂入水就踢到沙，仲要錯咗方向，腳骨裂咗，韌帶斷咗啦，同埋腳移咗位，但我以為自己只係扭傷，仲覺得唔使睇醫生啦，第二日都返香港，之後先睇醫生照X光啦。」

返港後的欣宜，才知道延遲治理相當大件事，「搭完飛機嚟，隻腳腫到成個波咁，啲腳趾係迫埋晒一齊，一照X光，醫生話要留院做手術，唔可以亂郁，先至知道原來咁大件事。」其後欣宜展示打了石膏的傷腳，並說今次受傷沒有打擊到她，「我會好努力做物理治療，用拐杖學咗點樣上落樓梯，放心，就算篤住拐杖，碌住輪椅上呢個紅館舞台，我都會盡力做最好嘅Good Show俾大家睇。」欣宜受傷休養，仍然掛住個紅館騷，大家記得購票支持啦。