宣萱主動獻吻　陶大宇︰拍得舒服又開心　

宣萱、陶大宇、吳啟華、蘇永康與監製鄧特希等人到尖沙嘴出席myTV Super網絡電視劇《隱世者們》，監製鄧特希在台上笑言劇集有大量鎗戰場面，比較少對白，相當考演技。而蘇永康就話今次合作班底好猛料，所以想都沒想就一口答應，但年紀大了要拍打到好似甄子丹，就非常有難度。

與吳啟華相識近30年 第一次有交流

陶大宇與吳啟華由藝員訓練班便相識近30年，但首次有交流地合作倒是第一次，大宇說：「我同啟華一入行就識，雖然在《壹號皇庭V》同劇演出，但就無交流，今次就第一次，因為大家識於微時，所以都勾起好多回憶，啟華變好成熟，又keep得好。大家話題又唔同，以前會講下去邊度蒲，依家就講點樣可以健康啲。」陶大宇與宣萱自09年《掌上明珠》後，再度合作，又有感情戲，大宇笑言今次拍得非常爽：「我同宣萱咀過無數次，但今次就係對方主動，都幾舒服。」吳啟華行過聽到都加多句：「梗係啦，唔使郁！」

宣萱同樣表示與陶大宇依然有默契，「就算大家要拍親熱戲，今次要自己主動，但都唔會怕羞同尷尬，反而仲拍得好開心。」宣萱話今次拍得比較舒服，因為她是唯一沒有打戲的演員，但記對白就有難度，「因為我飾演幕後主腦，加上監製最大特色是飛紙仔，所以每場戲拍前都要花點時間記對白。」宣萱表示剛拍完《不懂撒嬌的女人》在上海的外景，10月底煞科後休息兩星期再拍《使徒行者》網劇版。