【又走一件】沈震軒正式約滿　離巢無綫全力北上搵真銀

9月已經預告自己11月約滿TVB的沈震軒（Sammy），幾個月來密密到內地拍劇搵真銀，人氣亦因此而急升，似乎向外闖一闖，前途反而更加光明。不過，完約之後又有甚麼詳細發展？沈震軒當時大賣關子，講明11月一到，大家就知咩事，似乎好神秘。時間好似幫沈震軒倒數，踏入11月1日，他的確非常準時，在社交平台上載相片，交代最新去向。原來沈震軒現在身處內地，拍攝深圳電影《風不止》。望真張相，見到沈震軒坐在劇組人員隔離睇playback，睇到個背影都覺認真。

早前33歲沈震軒在內地拍過劇集《你好喬安》試水溫後，反應不俗；加上約滿第一炮就有電影拍，同戲還有譚耀文、盧惠光等香港班底演出，聽落又好似幾好。沈震軒之前亦坦言內地酬勞豐厚，與香港有點差別，所以沈震軒在貼文中講到：「十年一轉變。今天正式約滿離開TVB。感恩我的演藝事業從電視台開始。期待在不久的將來再次合作。」雖然感激TVB，但同時暗示心意已決，皆因沈震軒講過：「本身事業心好重，由訓練班出身，一步一步向前行，所得到的一切，都是由自己爭取，如果沒有野心，好難在這行生存。」立定決心向外闖一闖，嘗試更多新事物，期望在電影方面積極發展。