陳奕迅《擺渡人》演歌手要留鬚感難頂 偉仔忙拍戲未為嘉玲慶生
撰文：郭敏玲
出版：更新：
梁朝偉、陳奕迅（Eason）及台灣演員張榕容為宣傳喜劇電影《擺渡人》，乘著「張保仔號」遊維港，吸引了近百名市民圍觀，場面非常熱鬧。三位演員更為配合電影裡的酒吧主題，即場調酒。梁朝偉一聞支酒，就覺得啃；只有Eason敢小酌一口，仲話杯酒好似水咁！
梁朝偉、張榕容及陳奕迅坐船遊維港宣傳電影《擺渡人》，夠晒配合主題。（郭敏玲攝）
偉仔表示很久沒有拍過喜劇，「之前同王家衛合作過，但拍嘅係劇情片，今次拍喜劇，感覺就輕鬆啲。」他與Angelababy（楊穎）首次合作，覺得對方是個很努力的演員，演戲演得不錯。12月8日便是老婆劉嘉玲的生日，偉仔表示因工作關係未能慶祝，「我仲拍緊電影，噚日拍完，今日就返嚟宣傳，如果忙嘅話就無辦法，佢都無咩所謂。（係咪都唔需要準備驚喜？）唔係唔使，都要得閒先得。」
陳奕迅就一如既往咁調皮啦。（郭敏玲攝）
至於Eason在電影飾演歌手，而且要留鬚、但佢就表示頂唔順，「我有曾經嘗試留過，但總覺得透唔到氣，而且仲好痕。」問到角色同自己有甚麼分別，Eason說：「戲入面個角色就出show一定要唱自己嘅歌，但係我呢就無咩所謂。」
梁朝偉的魅力依然不減，尤其是佢對憂鬱嘅眼神！（郭敏玲攝）
台灣演員張榕容今次在電影裡與金城武有很多對手戲，她大讚對方私底下有很可愛的一面。張榕容在戲中更會強吻金城武，她笑言那場戲很搞笑，問到現實中會否強吻男生？她說：「男生在這方面應該要主動吧？」而她媽媽將在12月23日生日，剛好是電影上映的日子，張榕容表示：「我會帶她去看電影，生日去看喜劇會很開心吧。」
三人即場調酒「See you tomorrow 」，偉仔一聞就覺得好啃呀。（郭敏玲攝）