36歲譚俊彥入TVB極速擔正做特技人 故事似足《阿郎的故事》？
TVB自50年來，拍得最多，講得最多，不外乎都是爭產、宮廷內鬥，或者情情愛愛、你儂我儂......這些題材已經拍到爛。近期就比較好少少，《心理追兇Mind Hunter》是久違的懸疑劇之一，摸不著頭腦是TVB懸疑劇倉底都有一堆，點解唔播返《千謊百計》？不過點都好，TVB開始努力嘗試拍特別題材劇集，接著7月初將會開拍新劇《特技人》，監製王偉仁上一套作品就是《心理追兇Mind Hunter》。顧名思義，就當然係講特技人，據知男女主角都揀好，就係新加入TVB的譚俊彥與王君韾，說不定王君韾將以時代版花曼現身，場面令人期待。
《香港01》訪問到監製王偉仁，他就講到確實會開拍《特技人》，不過女主角就不會是王君馨喇：「Grace之前都有同我講佢7月嗰時會結婚，加上開呢套劇時都未有諗過搵佢，今次唔夾就搵下次喇，唔會冇機會。」監製講到女主角將會是朱晨麗，強調對方不是「執二攤」，揀Morning朱全因為對方夠tough：「佢份人好男仔頭㗎，好豪邁。而且佢又識跳中國舞，做動作方面成件事會好睇好多，踢腳都會好好睇。」監製講到朱晨麗會做很多危險動作：「佢會成日飛威吔，要好硬淨㗎，佢最盡都會跳凌空一字馬，但都要再同武指傾。」
特技人名為Stuntman，武師都係叫Stuntman，但大家一定要分那麼細！因為監製話：「前者係會做飛車、跳樓之類嘅特技，後者就著重拳腳上嘅郁動，係唔同㗎。」今次應該是TVB史上第一套劇講特技人，王偉仁就話：「其實佢哋係無名英雄嚟㗎，佢哋都係義氣仔女，所以想話畀大家知佢哋喺背後做啲咩。」有些故事靈感來自他的特技朋友，但他就不便透露是誰：「佢哋好多都年紀大，20年嚟係咁撻落地，都捱到殘晒，要退休。我又唔想搞到個故事咁悲，就算唔係Happy Ending，都會勵志少少。可能身體上嘅損傷都會交代，但死人冧樓嘅嘢就唔會著墨太多。」監製講起男主角譚俊彥，他說：「佢就比較會係有故事啲，比較似係《阿郎的故事》嗰種，慘少少。」除此之外，劇集還會有關楚耀、傅嘉莉、羅浩銘等人參與，監製話：「飾演特技人嘅演員，要飛車、飛電單車、跳落樓，係必需嘅，冇得走嘅。」聽落個心都替佢哋離一離......好在監製講多句：「最盡都會有替身嘅...」特技人嘅替身？咁會叫咩呢？
至於女主角朱晨麗近期密密做運動，看來似為《特技人》做好準備。《香港01》再訪問朱晨麗，她承認接拍特技人一劇，說：「近排做運動，係想自己身形再fit 啲 ，體力各方面再strong 啲,裝備好自己，要再努力練多啲，希望有更高挑戰。」至於佢係咪真係要飛落樓，到時真係要拭目以待呀。