【集體回憶】47年歷史新藍塘餐廳除夕結業　食客：最愛咖喱飯

於港島堅道經營近半世紀、街坊學生稱為「高主教（書院）飯堂」的新藍塘麵包餐廳，因不獲業主續租，將於除夕（31日）結業，成為中西區集體回憶。

新藍塘入口兩旁分別是水吧和麵包櫃，窄長走廊擺滿細檯，穿過走廊才有大檯，裝修和陳設都是典型老式「茶記」格局。與太太共同經營餐廳的老闆鄺先生，不時來回餐桌與廚房，向客人遞上碟頭飯和飲品，既是老闆，也是伙記。

業主稱要收回舖位翻新消防設備

老闆鄺先生向《香港01》記者表示，約於兩個月前決定結業。因為業主表示餐廳消防設施老舊，若不更新會被政府罰款，因此要收回鋪位整修，他淡淡的說：「咪提早交鋪俾佢，等佢好做嘢囉。」鄺先生又引述稱業主稱，不會再租給食肆，因此打消重開念頭，決定2016年最後一天結業。

由伙記做到老闆

鄺老闆憶述，新藍塘於69年開店，自己於上世紀70年代開始在新藍塘打工，當時店裡只賣麵包，直至81年擴建才兼營茶餐廳。到89年6月，舊老闆不做了，自己便接手。由伙記晉升為老闆，鄺先生與新藍塘共度了超過40個寒暑，講到結業感想，他說：「俾自己唞吓先啦，接手後廿幾年冇放過假。諗住休息兩三個月先，再睇吓點。」稍刻又說：「或者搵份工打吓......我唔做，生活點呢？」

鄺老闆說，每日早餐、午市、下午茶時段都會親身上陣，到了下午4時多比較空閒，就要準備翌日的食材，預備完，晚市伙記收工，幾乎都是自己一腳踢，「日日6點幾返嚟，做到夜晚8點幾」。隨著年月過去，堅道名字依舊，街上店舖臉目全非，「留低嘅茶餐廳仲有一兩間，麵包舖就冇喇......慢慢有超市呀、麥當勞呀、7-11呀，真係好多嘢食。」歲月換去堅道輪廓，也帶走不少客人，「以前做一日，（收入）頂依家五日。」

唔做唔代表我唔會返嚟㗎嘛​

「以前好多高主教（書院）、真光（香港真光書院，現已遷往鴨脷洲）啲學生午飯時間嚟食飯㗎。」新藍塘被稱為「高主教飯堂」，但近年盛況不再，至近日知道餐廳結業，不少人特意重遊舊地緬懷。「有時太多人我都做唔到（低聲一笑）」鄺老闆說。

被問到有甚麼想跟街坊講？「冇咩嘅，唏，街坊日日都見。唔做唔代表我唔會返嚟㗎嘛，以後我都會喺呢邊同街坊吹吓水。再唔係落去大家樂聚吓會咁，唔係一定會難過嘅。」真的不會難過？「冇難過，我兩個幾月前已經決定咗唔做，心情平復咗。開頭係多少有啲唔捨得嘅。」
 

招牌咖喱飯　味道溫和老少咸宜

「我哋最出名就係咖喱，入面料多又唔會太辛辣，但又有少少辣味，味道老少咸宜。」問起周圍的食客喜歡吃些甚麼，他們都直接說「梗係咖哩牛腩啦」、「味道香」、「唔會太鹹」、「份量夠飽」，人人讚口不絕。卓姓兄弟特意約在新藍塘與老闆告別，弟弟說：「我哋嚟咗幾廿年喇，當年喺隔離聖慈幼讀書，呢度仲係前身麵包舖時已經喺到食。以前堅道仲有甄沾記、小祇園都喺隔離，好多嘢食㗎。」，又說：「食嘢都算，冇咗個聚腳點先，嚟到唔食嘢都有好多老友上嚟吹吓水先。」哥哥笑了笑，接著說：「識咗老闆好耐喇，食咁耐唔熟都變熟。」

「初中時見這裡門口殘舊，當時又多地盤佬、阿伯阿叔幫襯，唔係好敢嚟，但後來跟同學一齊食，食吓食吓就習慣。最出名一定係咖喱牛腩飯，嚟得呢到就唔諗㗎喇。」高主教書院舊生陳先生，得知新藍塘即將結業，特意過來品嚐學生時代的滋味「幾年冇嚟過呢頭，頭先行過發覺成條街都唔同晒，變晒高級餐廳、咖啡店、家俬呀。以前好多小店，新藍塘已經係碩果僅存，都冇埋喇。以後再嚟條街都冇咩回憶㗎喇。」

隨傭人來吃午飯的鄧小朋友，遭告知新藍塘即將結業後，神情驚訝，狀甚不捨：「很傷心，同老闆識咗好耐。呢度好有人情味。」然後轉過頭問老闆「呢到要執笠嗱？」鄺老闆微微一笑：「唔好講執笠咁難聽！係結業啫！」

老闆：如找到合適舖位或繼續經營

問老闆會不會想繼續經營餐廳，「希望搵到位，唔太貴租，同埋睇吓政府出（食肆）牌要幾耐啦。你都知依家啲牌幾難整。」鄺老闆說，如果物色到合適鋪位，他也希望新藍塘的招牌能繼續下去。但政府發牌需時至少過百天，「太耐唔諗㗎喇。唔想俾租綁住」。