【颱風山竹】杏花邨邨民災後返工玩命記：在月台險被推落行駛列車

「我企喺東鐵月台度，一片混亂，又冇幕門。後面啲人係咁推，架車開走嘅時候，我失平衡跌向列車......」任職社工的Alice（化名）居於杏花邨，經歷一整天的驚濤駭浪，停電、滲水、冇升降機，沒預料颱風後長途拔渉到大埔返工是另一場驚險旅程。
強颱風「山竹」吹襲過後，新聞畫面不是塌樹、垃圾，就是住宅、商廈玻璃被吹爆，滿地玻璃碎、竹棚倒下壓倒車和人，市面交通幾近癱瘓。那邊廂，深圳、廣州已宣布停工停課一天，這邊廂，手機就彈出「天文台明早六時前考慮改發三號強風」，代表明天準時返工。而特首還要加一句：「僱主應彈性處理。香港不適宜停工，應互相遷就。」有網民開玩笑問：「香港係咪世上唯一有天災都要返工嘅地方？」為什麼香港不能有災後假期？

社工：學校活動取消　點都要「死」返公司

Alice主要負責青少年服務，平日於大埔的中心工作。其實，全港學校停課，活動取消，Alice和同事們深知上班亦是沒事多磨，她的工作性質絕非「做少一日會死人塌樓」。但員工們明白機構的文化，平日六時下班，外勤至五時半，亦要趕回公司。打風後上班日，沒有活動，也要處理文件或購買其他活動的物資等非逼切性的工作。即使昨夜特首呼籲僱主彈性處理僱員上班，她沒有奢望星期一能放假或請假，心裡只盤算要怎樣上班：「總之返工時間，人一定出現喺Office。年假要一星期前申請，好難即刻請到假，亦都冇人夠膽提出請假、Home office（在家工作），所以點都要死返工。」

Alice有同事為避開人潮，前一晚請一小時假，最終也是徒勞。同事們攀山涉水回到中心工作，點擊看其中一位同事從錦上路到大埔上班的路線：

颱風過後，想Home office都難

即使僱主容許員工家中工作，雖是人道，但災後假期，容許停工才是顧及情理，一來居民可以即時處理自己社區善後的工作，二來不是人人的家都還能Home office。
有位杏花邨居民Rebecca說，手機還未收到訊號，全家人依賴一部電話充當WIFI蛋。記者聯絡她時，Whatsapp call也多次斷線。她本來打算到杏花新城的咖啡室工作，但商場同樣徹底淪陷，暫時封閉：「我𠵱家唯有返屋企，2分鐘send一封email咁慢慢做。」

紅綠燈吹毀行對頭車

Alice自知沒有home office的優待，翌日特地提早一小時出門。颱風過後的杏花邨是一片發泡膠海，「紅綠燈又摺咗，雙線得返單線，行對頭車，自己覺得OK就衝過去。」她要先繞過散落一地的玻璃和海上垃圾，閃避倒塌的大樹，最後才到達地鐵站。

只廣播唔好玩手機：應該要講吓新安排

上到車當贏？錯了。杏花邨前往九龍塘的車程也一切如常，她曾天真以為車程如此順利，甫下車始知不妙：「一落車，就喺觀塘線月台已經開始排隊轉車去東鐵線嗰邊。」由觀塘線月台開始，她等候45分鐘才走到東鐵線範圍。

站内的職員分批安排大堂的乘客前往月台候車，等候半小時後到了東鐵線月台，她才知道九龍塘站正實施單軌雙程，同一月台有前往紅磡和羅湖的列車，亦不知前往羅湖或落馬洲方向要先乘前往沙田的列車：「上到去有啲人問職員，佢先講話要去咗沙田再等，唔使等到有紅磡車。啲廣播淨係講搭扶手電梯就唔好玩手機，做咩？應該要講大概安排係點、等幾耐、去大埔之後嘅站要搭咗去沙田先。」

爭上車如《屍殺列車》　車廂有孕婦！

Alice在月台等候的1小時，彷如經歷真實版《屍殺列車》：「同一個月台serve曬兩個方向嘅乘客真系好唔理智，企喺前面但唔系上嗰班車嘅乘客只係不斷俾人推入車廂。」每當有列車抵站時，人潮就不斷向前推進，Alice也無法控制步伐，落車的人又被上車的人潮推回車廂，不斷叫著「我要落車啊！」、「咪阻住晒啊！」，車門多次夾到乘客都未能關上。「大家都好鼓譟、好唔耐煩，有啲人真係咆哮咁大聲話要落車，有啲最後都落唔到。」當時場面混亂，有孕婦、老人下車時差點被推倒，「其實根本就無路畀人落車，係身邊啲人大叫有大肚婆，啲人先暫時冇再逼。」

職場權力不平等　如何與僱主協商？

回過神來，Alice放棄前往大埔，唯有向上司要求前往其他中心工作，改往紅磡：「好攰，8點出門口，11點半先可以坐定定。」Alice歷盡艱辛才回到工作崗位，後來又看到有途人被塌樹壓倒的新聞，她氣憤政府何不直接宣佈停工一天，或帶頭宣佈公務員停工一天，鼓勵私人機構、公司仿效：「唔明點解珠三角好多地區都停工停課，我哋偏偏要返工！起碼都要保障到安全先。周圍都咁危險嘅時候，交通都處理唔到人潮，點解要咁樣返工？」

為甚麼不反抗，或嘗試提出意見？「唔夠膽啦。個個都係咁諗，咪都係要返工做奴隸？喺度抱怨嘅同時，其實大家都喺返工嘅路上。」政府期望僱主和僱員協商工作安排，其實就是離地。職場權力不平等，打工仔都害怕丟了飯碗，又有誰會主動提出呢？

《01社區》會繼續探討和報導「災後假期」的可能性。