【夢中婚禮（上）】妳正嫁在別人的期望下
想要夢中婚宴 須贏在求婚前？
作為一個做開event嘅人，每次聽到人講「搞婚禮好煩」，我都不以為然，覺得到我嫁嗰陣，自己應該Handle到。而且我要求唔高，真心希望個婚禮係乜都最簡單、唔好太多圍、歡樂而充滿祝福，同埋最緊要啲嘢好食，可以令來賓借機聚舊就可以。
但原來我錯。
婚禮之所以煩，唔係因為件事複雜，係你身邊好多人甚至整個社會都對「婚禮」好多期望，不知不覺，許多新娘子便「嫁在別人的期望下」。
話說我同男朋友其實就嚟結婚。男朋友求完婚無耐，我哋當然喺濃情蜜意化不開嘅狀態，好想打鐵襯熱快啲結婚，所以我哋由決定擺酒到婚宴當日，是半年時間。半年準備一餐飯，我認為足夠有餘，心諗：「我搞一個幾百人嘅演唱會，都只係三個同事做兩個月，一場晚宴輕而易舉。」
淡淡定去婚展，先發覺喺香港搞婚禮要贏在求婚前。
1. 場地，搶啊！
首選戶外草地場，無無無；次選尖沙嘴任何場，滿滿滿。真係咁好生意？我唔信！離開婚展後我喪打咗廿個電話，只要係尖沙嘴區，我唔理budget、唔理個場咩樣，打去問先，結果真係全尖沙嘴都無場……好多間都同我講「你嗰日大好日呀，做乜咁遲先book呀？我哋新界間分店有場喎，你考慮吓？有其他客問緊，再唔落訂就無埋喇。」總之不斷洗你腦叫你快手比錢。我唔想為咗個草地而遲一年先搞完個婚禮，最後搵咗個食評好高嘅場地，一樣好開心。
2. 化妝師，再搶！
化妝師又係要搶，我用Facebook search過結婚嘢，所以自動會彈好多相關廣告／專頁出嚟洗我版，就係咁，我透過Facebook亂搵咗30個化妝師，對話如下：
我：「大日子11月X日，請問新娘化妝幾錢？」
化：「請問2017定2018的11月？」
我：「2016。」
化：「吓！2016 booking喺2015就Full咗，你得返半年仲未confirm？（我心諗，係呀，仲有大拿拿半年！）我介紹另一個化妝師比你吖，啱就快，你嗰日大好日呀，再唔落訂就無。」
我：「好呀，唔該。」
化：「唔洗客氣，你記得話係我介紹喎。」（點解一定要提佢介紹？你懂的。）
香港人，搶夠未呀！？
我真係服咗啲新娘，點解會喺2016 Book定2017、2018嘅婚禮服務呢？
兩年後喎！
雷曼兄弟同California Fitness都可以突然清盤，你咁早畀兩年後嘅錢唔驚血本無歸咩？
仲有，你今日去試菜覺得好味，兩年後個大廚都換咗啦；
仲有你個wedding planner，係，畀錢嗰陣佢好細心又清楚你心意，但兩年後可能佢跳咗槽了。
一個婚禮閒閒地要二三十萬，點解都毫無危機感？是但啦，香港人乜都要快、搶咗先算。
「唔可以畀姊妹見到我個婚禮喺間普通酒樓擺。」<br> 「間婚紗公司好出名，邊個明星女神都喺嗰度訂裙。」
呢啲想法真係一啲溫馨感都無，場地夠grand、婚紗夠華麗，同你兩個之間嘅愛情有咩關聯？啲嘢係你想要／你需要／定滿足親友期望？
「你嗰日大好日呀，做乜咁遲先book呀…再唔落訂就無喇。」
新娘們有無諗過究竟係邊個灌輸你知要快手？賺你錢嘅人囉，佢哋嘅出發點唔使我講啦。
趕頭趕命搞場大龍鳳就等於幸福？
女人呀女人，我知你由細到大都幻想自己個婚禮一定要點點點又一定要有乜乜乜。但其實你個人靚就乜化妝師都好難化醜你，反之亦然，所以真係唔使搶。不如諗吓，個男人今日鼓起勇氣／一時衝動想娶你，向你求婚，鑽戒你收咗，但話要兩年後先真嫁，兩年後感情／勇氣／衝動乜都唔同哂啦。同埋你一定忍唔住好早喺Facebook轉status做engaged、post pre-wedding相，幾百個朋友like住恭喜你：「恭喜呀，幾時大日子呀？要幸福唷。」喺佢地心目中你嫁咗㗎喇，點知兩年後先收到帖，感覺就好似你又嫁多次咁。
我搵咗個朋友做婚禮司儀，我帶點尷尬同佢講：「我個婚禮好簡單，乜都無的。」他答：「你有一個好愛你嘅另一半。」
勿忘初衷，其實一切愈簡單，愈顯你心靈富足。幸福是你倆掌握到愛情最燦爛時的火花，彼此了解後決定一輩子互相照顧，而不是那個二千蚊印出來的一比一人形紙板，婚禮完後被打爆頭掉到垃圾桶。
講咗咁耐，有人會話，「結婚一生人一次」，為咗完美啲排吓隊都唔過份吖。「一生人一次」，我諗每對新人都聽過無數次，呢句話，到底係祝福還是魔咒？下集再講。
（本文純屬作者意見，不代表香港01立場。）