【夢中婚禮(下)】一生人一次,是祝福還是魔咒?

撰文:詩寧
出版:更新:

 「一生人一次」,是祝福還是魔咒? 

【上集回顧:妳正嫁在別人的期望下】

以前嘅婚禮場地,一般就係酒樓同酒店,而家仲多咗樣嘢叫會所……吖唔止,應該話全部「有枱、有櫈、有食牌酒牌」嘅地方都可以成為婚宴場地,就連快餐店都推出婚禮套餐,可以食好多薯條。然後又唔知邊度彈一份叫wedding planner嘅工出嚟,婚宴自此不簡單,江湖從此多事。

「我的婚禮,我想愈簡單愈好。」
「小姐,我哋而家做緊個套餐優惠好抵,只要23,888蚊就可以有2P1V全日攝影服務。」

所謂2P1V,即兩個人影相,一個人拍片。我隨意行入一間婚紗攝影公司,職員叫咗我入去睇相,我無畀咩特別反應,只係拎住張傳單邊睇邊聽,職員繼續講:

 「同埋而家只要你再加4,000蚊,就可以有埋簽名布、人形紙牌、成長片段同屬於你倆嘅MV,我哋會用航拍技術……」
「我應該唔需要加你頭先講嗰啲服務,我想愈簡單愈好。」
我微笑地答。

可能嗰日生意唔好,職員反臉了:

「差少少錢就對自己好啲啦!結婚一生人一次……雖然有啲人唔止一次嘅。」

原來佢係為我好,所以提議賺多我4,000蚊,真偉大。不過我始終覺得簽名布同人形紙牌好唔環保,成長片段同MV好無新意,所以還是走了。

我喺Facebook follow了一個「新娘必看」的page,每日都有大量婚禮資訊/聲稱自己係準新娘的bloggers教我消費。我睇過一篇介紹頭紗的文章,有間公司在普通頭紗繡上新娘的名字,然後定價1,388蚊。Blogger當然把那個頭紗形容得浪漫獨特,結婚一生人一次,點可以用一個普通頭紗㗎?只要你有咗呢個頭紗,就艷壓全場、傾國傾城、留下最美回憶……然後有一堆新娘留言訂購。原來而家啲婚禮要完美到喺塊紗度有新人個名,難怪賓客做人情做得少新人會嬲。

結婚一生人一次,細節當然要重視,但我更重視每一位抽空出席的賓客:我緊張斟茶次序唔好錯、唔好有任何一個人影唔到相……相比起頭紗有個得我先見到嘅名,我寧願將錢花在宴會菜式上,例如安排席前小食,大家唔使由6點餓到9點先有嘢食,或者鮑片升做原隻鮑魚,大家食好啲,開開心心。

最重要,我希望自己唔好喊到講唔到嘢,我好想清晰表達自己有幾感恩遇到在席每一位,呢班人有份將我打造成今日嘅我。各位公主,親友先係婚禮中最重要的元素,頭紗鑲鑽但無人嚟睇係無意思㗎。不過,前題係唔好乜人都請,最少你要相信佢嚟係真心祝福你,唔係嚟研究你有幾多金器、酒店樓底有幾高。正如子華神所講:「婚禮最重要唔係有幾多人,而係最重要嗰啲人都嚟齊!」

子華神所言甚是。(電視劇《My盛Lady》擷圖)
(本文純屬作者意見,不代表香港01立場。)