好嬲咁落去會點？

簡單講，男子拳擊56 KG 8強賽，愛爾蘭選手Michael Conlan輸咗比俄羅斯選手Vladimir Nikitin，輸唔係問題，問題係Michael Conlan本來就唔應該輸。因為成場比賽佢都打得好過對手，所以佢一直以為自己贏緊。當比賽宣佈結果之前，佢已經舉定手慶祝，點知！居然係俄羅斯選手贏！

Michael Conlan嬲到爆，即時對住台下三個裁判舉中指，唔係一隻，係兩隻一齊舉。

國際拳擊總會（AIBA）改奧運拳擊規則變十分制（10 Point Must System），又畀職業選手參賽，連本來個名都由Amateur International Boxing Association改做 International Boxing Association（但都係叫返AIBA），以為係想改革，改得更好睇，唉我真係太天真。

咩係十分制，以前又係點？

之前講過，職業拳擊計分每局贏嗰個有10分，另一個人9分（10-9），而一場比賽會有三個台下裁判畀分。例如，打五局，甲每局都贏乙，咁最後就係贏50-45、50-45、50-45（三個裁判分別比分），3比0甲贏。

之前幾次奧運都係打點制，打中有分之類，喺呢個情況下，選手就唔着重力量，但求多出拳多得分。計分方法唔同，就令業餘同職業拳擊變成唔同嘅運動，而且業餘拳擊觀賞性就無咁高。

但係今次改返做十分制，就出事。因為十分制可以好「主觀」，MMA比賽成日都出現「robbery」，即係明明大家都覺得佢贏，點知最後輸咗嘅情況。當然，有啲比賽係好接近，好難判，但果種情況兩邊都可能贏，大家都能理解，亦唔會叫「robbery」。相反，robbery係拳評人加拳手加觀眾都唔知點解贏嗰個人可以贏。你可以搵下「biggest robbery in MMA」，會搵到好多。

會出現呢個情況，有幾個可能：一係班裁判唔識睇拳、一係睇果時分心、一係就因為其他原因判本來輸嗰個人贏，例如錢。

係咪你唔專業所以睇錯

如果得我一個睇錯係我主觀問題。睇返場比賽，兩位評述員睇到第一回合，三個裁判都比俄羅斯選手10-9嘅時候，佢地除左「What?」「Oh my goodness!」「What are they watching?」之外都無野好講。

網上聲音：

Michael Conlan本人直接喺twitter問普京「AIBA問你要幾多?」：

一單之嘛？

首先一單都唔應該出現。一個運動員訓練咗幾耐先有得打奧運？亂咁判令佢由贏變輸真係好過份。

另外，都唔係得一單。哈薩克拳手 Vassily Levit喺91公斤級決賽，輸畀俄羅斯拳手Evgeny Tishchenko，由金變銀，一樣係俄羅斯選手，一樣爭議好大。

我無內幕消息，咩都唔知，但咁落去奧運拳擊會變成點，大家自己諗下啦。

睇返報導話：「國際拳擊總會（AIBA）周三回應爭議，稱經過深入評核後，有6名裁判與拳證表現「不符預期水平」，被撤銷在餘下奧運拳擊比賽中執法的資格。AIBA沒有透露這些裁判涉及哪些比賽，強調里約奧運已舉行的239場拳擊比賽中，只有極少數裁決有問題，所有賽果均不會改變。」詳細睇返下面連結，仲會講埋奧運拳擊會點防止作弊。

唉，炒完又點？都改唔返個結果，我情願你好好查下咩事，好過一下就炒完班人算數。仲有，如果背後有部門或者有人做手腳，就真係好可恥，好可恥！

（本文純屬作者意見，不代表香港01立場。）