雙錯誤令MAMA炸爛ViuTV

撰文:方以文
出版:更新:

有時抽到一手好牌,都要識食糊先得。今次 ViuTV 爭贏咗 J2,喺星期五晚(12月2日)直播韓流一級頒獎禮 Mnet Asian Music Awards 2016(MAMA 2016)。
一班 Kpop 粉絲熱切期待之時,我都希望新台做得好好睇睇,話晒喺抽起咗《矛盾2》唔播之後,ViuTV有啲進退失據,加上係大台台慶月畀人打到殘,借助呢個全港韓迷都想睇嘅頒獎騷,隨時可以扳回一城。
可惜,得到嘅又係一片媽媽聲。

好在最後關頭無cut到EXO拎壓軸大獎,如果唔係班粉絲洗板到幾時真係唔知。(網上截圖)

大家喺播之前,已經喺網上熱烈地「叮囑」ViuTV 要汲取上次 Formula E sharp cut 播新聞嘅教訓,唔好再播到最後最精彩一刻先嚟無得睇。今次新台就真係頂住,過咗時都繼續播埋壓軸獎項得主 EXO,畀佢哋講晒感受先播新聞,只係犧牲咗李炳憲嘅 closing speech,算係有交代。可惜出事位唔係喺最尾一刻,而係中間啲廣告,令到一班觀眾(特別係韓流粉絲)火滾,邊睇邊喺 ViuTV 個 Facebook 留言洗板。

錯在狂播自家宣傳片

發生咩事呢?有粉絲講晒粗口話「點解直播會有廣告」。呢個睇法我就有啲保留喇,我唔知新台用咗幾多錢先爭得贏 J2,不過呢個係有一定收視嘅節目,對於半年蝕咗 6,800 萬嘅 ViuTV 嚟講,係難得嘅機會吸返啲錢(無理由要免費商營電視台唔靠廣告賺錢啩)。有人用前幾屆播 MAMA 嘅 J2 做比較,話 J2 播嗰時無廣告。公平啲講,J2 佔 TVB 廣告份額咁鬼少,佢豪一晚幾個鐘畀你,有乜所謂?但係新台暫時得一個 channel,佢又點豪畀你唔播廣告呢?

中間啲廣告令到一班觀眾火滾,邊睇邊喺 ViuTV 個 Facebook 留言洗板。(ViuTV FB截圖)

不過播廣告都可以處理得好啲嘅。首先係自家宣傳廣告嘅長度絕對係控制之內。今次 ViuTV 喺 MAMA 播嘅廣告時間每次都勁長,當中有唔少仲係自家節目嘅宣傳片。播客戶廣告可以賺錢呢部分可以體諒佢,自家宣傳亦都在所難免,但唔係咁多啩。最搞笑(定係嬲?)嘅事發生喺 20:30 左右,先去咗一轉長廣告,返嚟去錄影廠畀主持講兩句,唔夠 30 秒就再去廣告,咁想人唔鬧你都幾難喇……

錯在去廣告cut一線明星表演

廣告係要播,但幾時播廣告就可以控制。幾乎次次都捉唔到好位去廣告,環節流程一早已經喺手啦,我見主持人都可以講到下一 part 係邊個出嚟表演。要播廣告,梗係避開啲一線明星。但係 ViuTV 就先後 cut 咗 EXO 、防彈少年團、朴寶劍、金裕貞同埋劉亞仁嘅部分表演或者頒獎講話,其中一次仲要係防彈少年團唱唱吓去廣告,咁就真係離譜喇。大家全晚等睇佢哋,咁都 cut 得仲直播嚟做咩呢?或者索性好似 J2 以往播叱吒頒獎禮咁,延後同稍為修剪過,唔使好似依家一忽忽咁眼冤,我估觀眾無鬧得咁甘。

現場播緊EXO演出前片段,但ViuTV就選擇去播自家節目《SHOWTIME我主場》嘅廣告。(作者拍攝及網上截圖)

睇得你 ViuTV 播 MAMA 係因為電視機大啲、畫質清楚啲,又或者聽唔明韓文嘅觀眾可以聽吓即時粵語傳譯。須知道依家睇騷,尤其是睇 MAMA 呢種跨國播放嘅大騷,係有好多種方法。除咗 ViuTV 之外,合法嘅仲有其他收費電視台,亦都有網上免費頻道好似係主人家 Mnet 咁都直播緊,唔合法嘅網上直播亦都大把,仲有萬能粉絲高速剪輯偶像得獎同表演片段放上網。有網民喺直播緊嘅時候,喺 ViuTV Facebook 度留言,提供其他睇 MAMA 嘅方法。我就轉咗去 tvN 睇直播,雖然聽唔明佢哋講咩,但係可以睇到佢哋嘅表演先係最重要。

ViuTV 已經過咗蜜月期,再係咁錯落去真係好難搞。次次直播都玩殘自己,睇嚟要極速改進下。

(本文純屬作者意見,不代表香港01立場。)