康華馬蹄露加樊亦敏中女拍MV　44歲康華：跳到成條筋歪咗！

康華、馬蹄露及樊亦敏為台慶推出新歌《伊人當自強》，仲拍埋MV。首歌一出，網民罕有地給予正評，紛紛話「首歌好正」，最多留言表示「康華好正」。三人還有聯同一眾年輕演員，包括傅嘉莉、蔚雨芯等今日在電視城進行台慶騷綵排。

最受歡迎的康華表示十多年沒有跳舞，日前為了拍MV，跳舞跳傷隻腳，「拍MV時要着高跟鞋，但不小心跳傷了條筋，成條筋歪咗，而家對鞋入面貼滿膏布。都要着住高跟鞋跳感受下，到時台慶都要咁樣跳。」提到網民大讚康華好正，她非常開心，「好多謝大家會鍾意我，過往我好比心機去工作，之後有好多信心，因為本身諗住會有後路，既然大家唔嫌棄我呢個老女人，我都會繼續做落去。」康華又表示不介意被稱為「盛女」，「我咁多年都靠自己，都好獨立，都希望咁樣鼓勵到其他女性，搵到自己的幸福。」

至於傅嘉莉都有份上台跳舞，但綵排的時候就有少少甩beat，「喺排舞室都無嘢嘅，但一踏上台板，有人望住就好緊張。都好擔心星期六台慶有更多人望住會有甩漏，都幾大挑戰㗎。」傅嘉莉表示自己零跳舞底子，最多都係跟朋友去玩跳舞班，今次排舞之後，發現樊亦敏依然咁勁，踢腿上天一樣無難度，簡直是她偶像。