「TVB關公王」曾醒明論盡各大老闆：陳志雲如仍坐鎮 改寫電視圈
一周前的除夕，身為無綫電視企業傳訊部宣傳科副總監曾醒明步出將軍澳電視城，告別他服務了42年的公司。多年來為公司拆彈解決公關問題，如今徐徐回望感受如何，他坦言不捨，說話背後，難忘遇到的伯樂及舊老闆，「我愛TVB，因為我係念舊的人」。
無綫電視去年11月19日慶祝49周年台慶，曾醒明於無綫歷經42年，見盡電視城風雲，對於歷年的「老闆」，由六叔「阿Sir」邵逸夫、六嬸方逸華、前總經理陳志雲及現任行政總裁李寶安等，「阿曾」對各人了解甚深。
論已故無綫榮譽主席邵逸夫——無架子噓寒問暖
邵逸夫（六叔）最為人印象深刻，當然為每年大年初一派利是及台慶，必然有當屆港姐陪伴左右，「阿Sir年事高，當時應該係諗過搵工作人員，但好奇怪，當年未有TVBuddy，港姐就係TVB代表啦！」至於何時開始，曾醒明說不得而知了。
曾醒明憶述，多年前有一次與阿sir「獨處」，「有一年冬天，當時仍喺清水灣（電視城），一次同阿Sir同𨋢，當然佢唔認識我啦，但突然同我講『着咁少衫？小心照顧自己身體喎！』，其實佢有呢個地位可以對我視而不見，但老人家咁同我講真係好深印象。」另一次為六叔與安排與飾演《包青天》的金超群午餐，金向六叔大讚訪港安排，六叔未有多言，只笑迎迎說「應該嘅！」笑容令身為下屬的他難以忘記。
論無綫非執行董事方逸華－－慳得有道理
不少觀眾都會叫方逸華做六嬸，曾醒明則仍叫她做方小姐，坦言她很有威嚴；不過也非硬崩崩的，他想起一年的冬至，方小姐出席一項無綫主辦的公開活動，節目結束後向他說：「我想請班同事食飯呀！記得要請呀，我認真㗎！之後記得畀返單我，要證明有請到呀！」數天後方真的向他「追單」，「佢就係咁認真的。」
外界經常說她很孤寒，曾為方小姐護航，「其實佢都啱嘅，喺佢心目中係應洗得洗，而且樣樣事情要親力親為。」
論前行政主席梁乃鵬－－開會永無超時
「佢同其他同事唔同，平日個個叫我阿曾，但係佢先會叫我做醒明，因為當時會陪佢出來講話同做簡介，所以同佢『感情深厚』。」曾醒明說。他難忘梁改善不少同事的福利，開會時間永無超時，同事出事他亦會挺身協助，是一名慈祥長者。
近年無綫均為高收視劇集辦慶功宴，原來最先由梁發起的。「佢不時會搞慶功宴，自己畀錢請同事食飯，仲會帶埋靚紅酒。後期因為破記錄嘅太多，大半年後改為公司支出，仲有為方便部分工作中嘅同事，改返喺公司食。」
論前總經理陳志雲--可令電視百花齊放
曾醒明始為人認識，相信是前職總經理陳志雲出席公開場合時陪伴左右。當年作為其直屬上司的陳志雲捲入涉受賄案，曾要協助廉署調查外，也要確保公司立場及保護同事，壓力頗大。事過境遷，他坦言工作40多年來，陳志雲為他「最老友的上司」。
「最深交無可否認一定係陳志雲，所以人地標籤我係『迷雲黨』,但我係唔同意咁講。事實點解我同佢咁close，因為合作性太強，佢好信任我。」曾多次提及欣賞這位前上司的親和力。
雖然陳已過檔商台擔任首席智囊多年，曾醒明仍難忘志雲大師能力，「我覺得如果佢仲喺電視圈，應該電視圈可以再改寫！電視製作可再更加百花齊放！」
無綫製作2小時《觸得到的故宮》收380萬 康文署深夜改稱馬會畀錢
論行政總裁李寶安－－相信同事專業
「李生份人好客氣，說話不慍不火的，同佢開會時都好開放（態度），同埋會相信同事嘅專業，但只係方間不認同呢個看法。」曾醒明於李在任期間離職，加上近年無綫作風有變及較早前對立法會議員毛孟靜的回應信，難以說服他是一個「客氣的人」。曾為他說好話，指李寶安比以往的高層較少出席公開活動，難免有所錯覺。
歷經邵逸夫、方逸華及殼王陳國強的三代朝臣，如今終退下火線展開退休後生活，曾醒明暫定會全力到泰北做義務工作。問到會否重回到電視圈工作，「好愛TVB」的曾醒明說：「如果有任何電視台，包括TVB叫我，我能力做得到嘅，自問有咁既工作能、咁既精神我唔排除。」如果係ViuTV或奇妙電視找他加盟？「到時再講，其實我鐘意TVB係工作環境同同事。」
