【救妻同學會】外闖27年做美指突回TVB 吳瑞庭:舊同事叫我返去

撰文:林迅景
出版:更新:

近年不少TVB小生離巢或減產,導致劇集常常出現「撞樣」情況,即同一演員,同期演出多套劇,感覺重覆,網民喊悶,不過偶爾或有驚喜。比如近來《兄弟》、《救妻同學會》兩套劇中,突然出現一位於香港新一代眼中既熟悉又陌生的演員,無論剛於元旦深夜播畢的《義不容情》,抑或仍未播出的重頭劇《白色強人》,甚至即將開拍的《降魔的2.0》都有他的演出,他是久未露面的綠葉影星吳瑞庭。
訪問攝影:梁碧玲

點解叫吳瑞庭做「Cult片綠葉王」?因為佢真係拍過好多有特性而又好睇嘅Cult片,就好似呢套《伊波拉病毒》咁,應該冇乜人唔識。(電影截圖)

俗語說:「人生有幾多個十年。」問起十年的自己在何時何地做著甚麼,可能都沒幾個人說得起,更何況是30年前。

吳瑞庭有「Cult片綠葉王」之稱,名字你未必記得,但如果是喜愛港產的觀眾就一定認得。

他在80、90年代在影視圈相當活躍,雖然飾演的大多是小角色或配角,但吳瑞庭幾乎甚麼角色也做過 ── 警察、古惑仔、斯文敗類,甚至連三級片也拍,電視劇《淘氣雙子星》、《義不容情》;電影《早熟》、《旺角黑夜》、《辣手神探》,甚至港產Cult片之最的《伊波拉病毒》,還有《南洋十大邪術》,吳瑞庭解釋為何如此搏命:「當時機會真係唔多,有人搵你就要去㗎啦,除非係自己接受唔到拍三級片。」

《南洋十大邪術》都係另一套經典Cult片。(電影截圖)
呢套係《古惑女之决戰江湖》,入面吳瑞庭飾演一個呃女人嘅「小白臉」。(電影截圖)

34年前跟黎耀祥周海媚做同學 入行後被誤認鄭伊健

吳瑞庭是1985年無綫電視「第三期演員進修班」(記者曾翻查資料,是「第一期」)的學生之一,同期還有視帝黎耀祥和周海媚。所謂「藝員進修班」跟「藝員訓練班」和「藝員招募班」頗為相似,只是訓練內容和課程長短稍有不同。

1985年入學,同年即獲無綫羅致,成為合約藝員。初出道時,吳瑞庭也屬「青靚白淨」一類,最有趣是當時不少電視迷誤認吳瑞庭是鄭伊健:「你知當年仲係好興寄信,當中有啲信好好笑,嗰時伊健仲係喺TVB㗎嘛,我就成日撞到佢。我哋成日見面都會講:『喂,我收到你啲信,好似係寄畀你喎。』伊健又會話:『我收到啲信,又好似係你㗎喎。』哈,可能係因為當時我哋個樣有啲似。(收過幾多信?)我記走嗰時儲咗成個大膠箱嘅Fans信。」

《義不容情》入面的吳瑞庭算得上係英俊小生,他出場不多,卻是其中一位送丁有康(溫兆倫飾)入獄的關鍵人物。(電視截圖)
戲份唔算好重,但係俊朗嘅外表就好突出。(電視截圖)

《蜀山奇俠》與郭富城做拍檔

如是者,吳瑞庭在TVB拍了不少經典電視劇,當中包括早前深宵熱播的《義不容情》,以及1989年劇集《蜀山奇俠》中飾演「笑和尚」伙拍飾演「嚴金蟬」的郭富城。在1992年結束了TVB的7年時光,離開時帶着一整個膠箱的粉絲信以及滿滿的回憶,到馬來西亞闖天下,令人意想不到的是,這一走就是27年。「嗰時都係人哋搵我去『馬來西亞HVD』做,嗰邊仲識到黃柏文、惠天賜、尹揚明,因為大部份都係香港人,差唔多二、三十人,好似個小香港嘅地方,真係開心到不得了。」

當時嘅飾演「笑和尚」嘅吳瑞庭同飾演「嚴金蟬」嘅郭富城。(電視截圖)

亞洲金融風暴回流香港 與歐瑞偉留守至最後

1997年亞洲金融風暴,全球經濟受創,連帶馬來西亞HVD也受影響。吳瑞庭坦言,97年算是最「愁」的日子:「我呢啲簽咗包騷嘅藝員係每個月咁出糧,但係嗰時HVD冇錢開唔到劇,我就日日坐喺度驚,因為要還騷㗎嘛。」最後,吳瑞庭還是選擇了離開。「我好記得,當年喺馬拉坐飛機返嚟嘅時候,即係最後一日,我同歐瑞偉係最後兩個香港演員坐飛機返香港。死磨爛磨,唔敢返香港(點解講到好似走難咁?)唔係吖,係因為香港都冇嘢做,瑞偉當年又喺嗰邊結咗婚。」

吳瑞庭廿幾歲嗰時真係勁靚仔。(網上圖片)

曾任夜總會活動搞手 後轉攻美術指導

吳瑞庭在1997年正式由馬來西亞回到香港這個地方,不過他卻選擇做場地佈置的工作,為夜總會安排節日活動,而不是重返TVB。沒錯,真的是香港舊時代盛行的夜總會。「其實間唔耐我都會客串吓電影,有人搵我就做。不過返到香港之後幾年,我就去咗幫夜總會搞活動,安排唱歌、跳舞、嗰啲都係我幫手去做。」為甚麼突然間轉行?他回答說:「其實我不嬲都兼職做緊幕後㗎,未入TVB之前,80到90年代我都係做緊賣衫Sales,入TVB之後嗰4年未放過一日假,嗰時連埋TVB藝員,同時間仲打緊4份工。(邊度打工?)Sales嗰份Part-Time係幫時裝設計師馬偉明(Walter Ma)賣衫。」

吳瑞庭對上一次返TVB同黎耀祥撞到。(受訪者提供)
吳瑞庭拍劇雖然多數都係做綠葉角色居多,不過有演技又點會怕冇人記得呢。(資料圖片)

曾歷人生低潮:而家都仲捱緊!

「唔好玩我啦,瑞庭哥,你做美術指導同佈景?」吳瑞庭表示自2000年已經減少幕前演出,將工作重心放在幕後,不過卻常常聽到這句說話。「我不嬲都要周圍捱,哈哈,其實而家都仲捱緊。我記得1989年六四嗰排真係好慘,嗰時自己喺旺角開咗間舖做批發布料同服裝生意,你知嗰排成個環境係點,同圍都冇人買嘢,我望住成舖貨都冇人買,真係流晒眼淚。我仲記得我買咗盒王傑錄音帶喺舖頭聽《幾分傷心幾分痴》,第一次聽到喊,真係好悲涼。」

呢個香港40,50年代的普遍板間房嘅廠係吳瑞庭搭出嚟㗎,遲啲大家就可以喺電視機上面見到呢個景。(受訪者提供)

為《荷里活有個大老千》任美指 舊同事與太太鼓勵再拍劇

「之後一直都係做幕後,直到幫TVB套《荷里活有個大老千》做美術指導、佈景,其實係同朋友一齊搞,仲有好多謝美術顧問林偉深同鄭偉文導演,畀咗個咁好嘅機會我參與《荷里活有個大老千》嘅美術設計,可以一齊做嘢真係好開心。嗰陣好多TVB同事、朋友,連太太都鼓勵我返幕前試下,之後再介紹我去藝員部。(藝員部點覆你?)佢哋話:『試下啦,你得嘅!呢個Moment好需要你呢個年紀嘅人。』咁樣囉。(型佬?)哈哈,我都唔多記得,年紀大冇乜記性。不過返咗TVB之後真係好唔同,覺得好受人尊重,又可以見返啲老朋友,真係好多謝樂小姐和珍姐畀機會我再返無綫。(唔做幕後,咪搵少咗?)做幕前其實興趣同滿足感大過一切,其實我都仲有做幕後嘢,不過比重就要少啲,托賴入咗嚟一年都好多嘢做。我個女都8歲啦,而家都係要繼續搵錢,做人最緊要唔好停。」

吳瑞庭在2010年結婚之後就改名叫吳昊嶸,希望婚後過不一樣的生活,再創事業高峰。不過返TVB嘅時候,大家都叫佢繼續用以前個名,所以大家行街見到佢都介可以叫佢「瑞庭」㗎。(受訪者提供)
+21