《Running Man》全昭旻李光洙曖昧新CP 接棒周一情侶Gary宋智孝
韓國綜藝節目《Running Man》自從Gary下車之後，又鬧出宋智孝同金鐘國「被下車」事件！令呢個逢星期日陪住大家足足7年嘅王牌綜藝節目，差啲就此玩完停播！好彩《Running Man》最後都渡過難關，更加入新成員梁世燦和全昭旻。無可否認冇咗智孝同Gary呢對「周一情侶」互動之後，《Running Man》嘅精彩位都減少咗，相信睇開RM嘅觀眾都會有同感吧？幸好隨住新成員同舊有成員愈嚟愈有默契，《Running Man》嘅新CP又誕生喇！佢哋就係全昭旻同李光洙，呢對CP唔單止私底下上過對方屋企過夜，更有「定情信物」添！而大家在《Running Man》又睇過幾多全昭旻同李光洙曖昧嘅一幕？
全昭旻同李光洙CP緣份係咁開始嘅！
講到全昭旻同李光洙「緣份的開始」，就要講到昭旻今年3月仲未成為《Running Man》固定成員時，以嘉賓演出的一集。當時全昭旻同李光洙做拍檔，而身為「背叛Icon」的光洙竟然反被全昭旻背叛，兩人嘅「冤孽緣」就係咁展開！
浪漫過偶像劇嘅定情手繩！
《Running Man》成員今年6月去日本玩戰慄迷宮嘅一集，成員們一齊走入精品店，而當全昭旻見到條宮崎駿手繩好鍾意，更撒嬌要李光洙買，當時光洙一句：「講埋啲冇用嘅嘢！」點知最後埋單時，光洙二話不說cool爆遞手繩送俾昭旻，原來光洙竟特登折返買手繩呢！呢一幕係咪好似台灣電影《我的少女時代》入面，王大陸偷偷買劉德華公仔鎖匙扣送俾宋芸樺一樣咁浪漫呢？9月一集《Running Man》內，李光洙要同全昭旻去印度尼西亞接受懲罰，昭旻更戴住呢條定情手繩現身，仲問光洙靚唔靚！李光洙即刻笑開花話：「好襯你！」真係閃爆人群！
《Running Man》成勛和全昭旻甜蜜互動 李光洙吃醋緊張盤問
全昭旻冧男星，李光洙會呷醋！
最近好多韓國男神上《Running Man》做嘉賓，全昭旻認真好福氣，唔單止可以同姜河那互相撒嬌扮情侣，仲伸手摸過成勳嘅胸肌！不過次次都俾李光洙發現，而光洙仲會衝出去阻止，就連成員劉在錫同Haha都懷疑兩人有古怪，Haha更話：「呷醋嘅話有啲古怪喎！」
Suho@EXO加盟Netflix《犯人就是你》 Running Man導演再拍劉在錫
醉酒過夜事件！
李光洙上過全昭旻屋企過夜，仲見埋家長，呢件事已經通晒天！兩位當時人都承認過，當時李光洙飲醉酒不醒人事，全昭旻剛好打電話俾光洙，於是代理司機將光洙帶到昭旻屋企，第二日光洙瞓醒仲同昭旻爸爸合照添！「過夜事件」尚未完結，最新播出嘅一集《Running Man》中，李光洙已戴住測謊機被Haha同宋智孝「盤問」！Haha問到上次同全昭旻一齊去印度尼西亞時，昭旻有冇入過李光洙間房？當李光洙答「冇」之後即被測謊機狠狠電了！即係講大話！李光洙立即澄清話只係喺房入面傾過拍攝事宜，不過Haha同宋智孝就一於好少理！到底全昭旻同李光洙呢對《Running Man》新CP，係節目效果定戲假情真，就留俾觀眾自己想像喇！
更多《Running Man》全昭旻與李光洙圖片：
我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/