【澳門立法會.來稿】票王唔選?今日澳門,明日香港!

撰文:投稿
出版:更新:

文:林茂塘邊鶴

澳門今年有立法會選舉,提名期剛剛結束。當中最重要的消息,係上屆票王陳明金話唔選。嗱,香港人過大海,通常都係食豬扒包買雞仔餅,有閒錢的就賭兩手,怕且都冇乜人會關心澳門政治。不過陳明金唔選呢單料,我建議香港朋友都係關心下好。今日澳門,明日香港呀!
 
澳門政治保守過香港好多,呢點可以追到上去文革對澳門和香港的不同影響,好多人講過,唔講喇。去到今日,澳門立法會都仲會有由行政長官委任的議員,成個議會33席入面得兩三個叫做民主派,都可想而知悲過香港幾咁多。不過今日唔係同大家講澳門民主派,係講另外果班。
 
今日的主角係陳明金。佢有幾勁呢?澳門人少過香港,上屆立法會基本上六千幾票就有一席,陳明金張名單有26426票,一次過攞三席。順手一句,澳門同香港唔同,計票唔係用最大餘額法,而係用修訂狄漢法,而呢個方法係鼓勵每張名單攞兩席的。陳明金一張名單攞三席,係浪費選票。如果分兩張名單而又配票成功,隨時可博多一席。

澳門人少過香港,上屆立法會基本上六千幾票就有一席,陳明金張名單有26426票,一次過攞三席。(視覺中國)

再比較一下。民主派的吳國昌,上屆攞10986票,得一席。全澳門有廿幾個票站,吳國昌平均每個站攞三四百票左右。陳明金呢?佢最多票果個站係中葡職業技術學校,2559票,一個站攞的票已經係吳國昌總票數的四分之一,你話癲唔癲?

點解佢會咁多票呢。中葡職業技術學校個位置,就響黑沙環同祐漢中間。香港人去澳門,來來去去都係新口岸同路氹,有冇發覺呢兩個地方基本上冇乜民居?澳門居住人口最密集的地方,其實響澳門的北區,近關閘果頭。呢度就係陳明金的根據地喇。香港有蛇齋餅,佢就直頭開一系列「陳明金愛心超市」,登記做佢做助選團就有折,你話佢個「鄉親關係」同「社區網絡」可以有幾勁?錢呢家野,佢又真係洗得起,官方登記佢擁有逾四百個住宅物業、舖位、寫字樓及車位,另外一百一十三間商業企業及公司的股份,間愛心超市真係蝕住黎做都唔緊要。告佢賄選?真係有告過呀,告佢競選辦職員囉,佢自己冇事。

好喇,講左一大輪,介紹完陳明金呢個人,無非想講一件事:一個人花左咁多精力建立自己既政治資本,終於做埋票王,又全國政協又大學校董會主席,只不過五十四歲人,點解會無啦啦唔選?話俾個機會後生仔?講你都唔信啦。你話我鄭子誠都好,我唔信件事咁簡單。

共產黨管特區無論香港定澳門,由制度設計開始就有一個目的:打散任何潛在由下而上的權力來源。特首唔可以有政黨背景,響立法會一票都冇;而立法會的建制派要生存,就要聽中聯辦指揮。唔理你係乜派物派,總之就唔可以坐大。自由黨唔聽話,就來個經民聯。民建聯夠聽話啦,一樣整個新民黨出來hedge你。輪到葉劉麻麻煩煩,就再插一個容小姐落去。係呀,乜你以為容小姐同葉太真係好friend咩?

如果我係新界原居民代表,我應該好驚。原居民呢個政治特權,前朝餘孽過前朝餘孽啦,當日俾面你係一件事,唔代表永遠都要。(資料圖片)

返過黎珠江口的西面,喂,票王喎,咁把炮,容乜易連松山都唔放在眼內架(澳門中聯辦位於松山東望洋燈塔下面)。都係唔好再選喇。建制派都有好多種,澳門政治又咁多灰色利益,養個平啲聽話啲既仲好。講明先,我冇證據架。但係睇翻西環同松山近年的動作,好合情合理。任何一個人冒起,下次就要收皮,邊個派別都冇情講。

未回歸到剛剛回歸,都仲話要拉攏本地勢力確保順利過渡。過咗廿年,都係時候將呢班人換走,轉用自己親手培育出來的人了。佢地有冇能力唔重要,最緊要可以直接控制。要低成本,零風險。

呢個故事教訓我地乜野?如果我係新界原居民代表,我應該好驚。原居民呢個政治特權,前朝餘孽過前朝餘孽啦,當日俾面你係一件事,唔代表永遠都要。按前面的道理,到適當時候,西環點可能會唔出手,換過第二班政治上maintainence cost更低的人來做代理人?如果我係原居民代表,我會要求立即普選鄉議局,第時可能仲會有地方企。如果唔係到被人全批換走的時候,就喊得一句句。一理通馬國明,根本成個建制派都活響第二管治梯隊的陰影下面,土共終有末日的一天。

當然,更有可能的,係呢班友已經諗住移民,只係想用剩低的政治力量賺埋最後一筆,然後一走了之囉。

(本文為投稿,稿件可電郵至iwanttovoice@hk01.com;文章純屬作者意見,不代表香港01立場。)