【小時在澳門．博評】假如當年我沒回來香港⋯⋯

一個颱風，打出香港人同澳門人之間嘅矛盾。

呢個其實係城市文化（民族性）問題，我明，因為當年我在澳門生活過。是咁的，我喺香港出世，但係屋企人好快帶咗我過澳門，喺嗰邊讀幼稚園。

其實澳門嘅教育制度唔差，英文程度同香港差唔多，數學更係緊跟內地課程，學生會上珠海買內地高考練習來操練，好癲。唯一唔好係當年澳門本地大學選擇唔多，所以屋企人決定為我嘅前途著想，帶咗我返香港讀小學。後來我符碌碌咗入中大中文系，畢業後投身傳媒，成就而家嘅我。

我有個年紀相若的表妹，都係香港出世，當年決定繼續喺澳門讀書，後來赴美讀大學，學成歸來後澳門賭業正盛，佢好似大部份澳門人咁，加入賭業做酒店櫃檯。憑表妹嘅才智同見識，理應可以喺香港創一番事業，但係佢決定留喺澳門，因為香港太多競爭，佢已經太習慣澳門laid back 嘅生活，見到香港人乜都急餐死，連行路都快過人，佢真係好唔慣。

「習慣」，可以話係澳門人嘅金科玉律。佢哋很擅長適應，慣了順從、照跟，out of the box 思維比較少，同香港一向標榜要競爭、要特別、要贏、不平則鳴，是截然不同的價值觀。表妹經常抱怨香港來的客人「嘈生晒又諸多事實」。當然有些香港人是無理取鬧，但細心想來也許與城市文化有關，香港人就是比較肯出聲反對。

香港人想到的，澳門人也想到。只是香港人有抗議文化，澳門人慣了順從。在香港，我們以為理所當然的事，如公共設施、交通系統、醫療制度、新聞自由等，澳門都比較落後。我曾在澳門大學一個主播比賽做評判，席間我問那些參賽的澳門同學們，將來想當記者嗎？他們都說不想，理由是澳門媒體寥寥可數，工作機會太少了。那想做什麼？有些人早已計劃畢業後去當公關，更多的是選擇加入賭場。

我在澳門生活過，當年澳門舊居曾遭爆竊，警員草草上來一看，着我簽張行街紙回港便算，根本沒想過去查。每次回去澳門巴士難找，的士也難得停下，教人十分勞氣。「大海」彼岸的變遷，點滴在心頭，如果當年我沒有回香港讀書，會變成怎樣的人？天鴿來襲，正好是時候思考，年年派錢還是基本建設重要？

（本文純屬作者意見，不代表香港01立場。）