【德國生活誌】病了就要看醫生　入診所記得Guten Tag

沒拾栗子沒中毒（按此回去上回提要），但一邊放晴一邊落雨的德國，總是特別容易玩謝你。

自問幾捱得，在牛津幾年甚至冇病過（謝天謝地！），返到香港亦實實際際訓練到唔病到冧樓都唔去睇醫生。但前星期迎來一個大風暴，未學識德語的小菲在漢堡都係出到街先知發生咩事，做了一整日德國落湯雞，翌日就發高燒了。

個個都嚟睇醫生，唔通個個都想睇德國醫生？

讀過報紙先知道，又原來真係個個都想去德國睇醫生。先前就有張大信用卡品牌，搵英國著名學府的研究院做過調查，發表報告講到明愈來愈多人湧住去德國睇病。

What？原來唔係剩係賭神電影同 TVB 先有嗰種去外國醫病的習慣，被號稱為醫療最發達的德國成為各地有錢佬的首選。而排最高名次的，唔使講你都已經知，就是我哋偉大的同胞們。

其後小菲翻查報導，又發覺原來大陸旅行社帶團去德國，除了去景點打卡，更會包帶你去做次 body check。醫療旅遊二合一，你都咪話唔過癮；搵間診所一條龍服務，邊等邊食 currywurst 都仲得。簡單過去韓國執完個樣腫住去搭飛機啦，right？

聽到呢度，真係汪明荃個心都離一離，發緊的高燒都縮返落去，小菲都係啪多兩杯薑茶算數。

打工仔都想去德國放病假

以小菲不準確的目測，德國打工仔的請假慣例都係兩、三日起標，唔休息到完全康復都唔會返返工。喂，我病得咁辛苦，緊係唔想傳染俾人啦，係唔係先？你估好似喺香港病到隻狗咁，公司都只畀你休半日，更甚比你早走個零兩個鐘休息下咁大把咩。

德國醫生通常一般都唔建議你食藥，十個有十一個都叫你去訓覺飲水充足的休息，真係再唔掂先再算。咁如果真係唔掂，佢都會寫張藥單俾你去 Apotheke（藥房，紅色 A 字標誌白色十字，側邊有條蛇仔）執藥。Apotheke 通常開正醫生樓下，而且德國的藥房開到同元朗一樣咁多，總有一間喺左近。

有人話德國藥賣得好貴，呢一點小菲就有幸（touch wood）冇乜體會過。一盒 20 粒 400mg Ibuprofen 賣 2.5 歐元，貴唔貴見人見智，你拎去同美國比就實係貴。

至於外國睇醫生一般都需要預約。網絡發達，唔識講德文，打唔到電話，都可以用手 click 兩 click 約好。而家好多醫生都會預留半小時 time slot 開放畀急診人士，亦即係話你病起上嚟急住要睇 book 唔切，都可以 walk-in 俾醫生診一診。

要留意的是星期五、六、日大部分醫生都唔開門做生意，所以在德國，要病就最好揀星期一至四，但都要小心提防診所下晝唔開門。咁當然都唔會每逢周末就全城冇醫生，醫院同部分醫生都會輪流當值，而醫生亦都會有緊急聯絡電話，俾你有緊急事的時候召喚佢，唔使擔心。不過，小菲都會奉勸你都係揀返二、三、四先好病，因為星期一真係多人啊，等都命都冇就唔係幾好。

入鄉隨俗，同病相鄰的病友咪 say 個 hi 囉！

頭痛同鼻水沒有因為幾杯薑茶而遠離小菲，身邊的人都開始係咁話：「趁星期四，睇咗醫生先啦。」

住得喺度，基本上等於你已經有保險。那張藍色底印有達文西著名的人體比例圖的醫療保險卡，緊要過你張身份證。畀張卡姑娘，佢會先抄牌，再安排你去輪候區等叫名。姑娘用同小朋友講嘢的語氣同小菲講：

大概等半個鐘左右。而家天氣幾好，你可以落街行個圈，但你落去的話我會擇低你個名，返嚟要同我講返聲喔。

為免上上落落麻煩，小菲頂住一整個頭都痛的狀態，都係選擇留喺曬到太陽的 waiting room 等叫名。

嗱，講出嚟唔好笑，以小菲驚青又滕雞的性格，睇醫生前爬過文係好正常。原來喺德國睇醫生，有個「odd German custom」，就係入 waiting room 要打招呼，走的時候講 bye bye。

打招呼當然唔係問題，小菲係荷蘭訓練有素，就連到見到路過隻狗都想 say hi，不過德國同英國普遍地區都冇咁親和的，三唔識七，就算窄路相逢都冇人會打招呼。但當小菲踏入 waiting room 的瞬間，全部人抬頭講句 「Guten Tag」的時候，就知道有幾怪。不過，大家各自病住都咁齊心，同病相憐打個招呼亦都令人感覺好溫暖就真。

等半個鐘就有人入 waiting room 叫名，再帶你入房。入到房先知道原來頭先喺 waiting room 叫名認領你入醫生房的就係醫生本人。咁岩小菲睇嗰個醫生都幾幽默，緊張感一掃而空，留低的都係流唔完的鼻水。相對之下，小菲頓時覺得香港的醫生大部分都 2.0x fast forward，一入去循例問兩句就畀藥趕你出去再叫下一位。

最後，就算揀睇西醫，其實都奉行自然療法，即係睇完只要唔係大獲甘，都叫你飲水瞓覺。小菲一邊打字一邊消耗兩包 T 牌紙巾；係啊，香港最大的紙巾品牌都係德國出㗎，呢度買又平又好用。

（文章純屬作者意見，不代表香港01立場。）