的士環球風情畫 唔知好嬲定好笑
要耍無賴,定係好似日本司機咁,省靚啲架車,等人地畀錢畀得心甘命抵。香港嘅司機大佬,我明你地車租油錢有幾貴,供樓壓力有幾大。求財啫,大家都係,你地面對既,我地都面對緊。
香港的士司機,一句到尾,求財。
一個長住在香港的鬼佬教我的秘技:
有理冇理,上咗車先算。
未上車之前,死都唔好答司機要去邊度,放工時間過海都截到車,萬試萬寧,鬼佬拍心口咁話。我納悶,可能聽唔明、或扮聽唔明 18 個字嘅廣東話粗口,冇所謂。
日本司機 算係最樂意載短程,朝早 5 點 call 車,都戴晒白手套,笑容可掬。仲自己拎埋一個類似快譯通既物體,同我英日對話。好多人話貴,但早排有優惠,前一晚 call 定車,由新宿去羽田機場都係 6,000 幾 Yen,抵過 Airport Limousine 啦。
在巴塞隆那,遇過一個超潔癖既 西班牙司機,早上 6 點出發,我帶了早餐剩下的半份 cold sandwich 上車,真係好肚餓。禮貌地問司機「介不介意我在車裏吃東西?」他說 OK,後來變咗忟憎精,嬲到狂噴芳香劑。
又遇過一個大陸嘅的士司機,車在 highway,明明講好跳錶又反口,要求 3 倍車費,中途停車話要抌晒我啲行李落街。
但最搞笑既,係 希臘嘅的士司機。
在希臘工作的時間,住在 Acropolis 附近的 apartment,冇租車嗰日,就靠的士。有一次從 Santorini 飛回 Athens,地鐵搭到 Syntagma Station,就打算轉的士回去。
一上車,白頭髮胖胖的希臘司機,親切得讓人意外地咿開棚牙笑:「啱啱落機呀?」
本着講多無謂的精神,我迅速交代地址,並加了一句:「跳錶,唔該。」
如果單純地以為,的士司機是攞料或了解當地風土人情的好對象,那就徹底的錯了。7 月前要還 23 億歐元的國家,人工和 pension 都大減,大家都吃不飽的同時,沒有人有這樣的閒情逸致跟你做朋友。
白髮胖司機依舊笑容滿面,「跳錶,好吖,冇問題。」並詳盡地介紹 apartment 附近各餐廳景點及推薦菜式。我心裏暗想:「唔係有行李就係遊客,好唔好?」
不是不想相信希臘人,是自我防衛意識自然提高,畢竟這是我和 crew 到埗 3 天之內,就被地鐵員工敲詐和遭遇搶劫的地方。
7 分鐘的車程,沒有兜路,到達,停車,crew members 一個箭步落車搬行李,司機嚟料。
「阿小姐,多謝你 7 歐元啦。」
「個錶唔係寫明係 3.5 歐咩?」
「係,但係你都可以畀 7 歐元我架嘛。」
咩事呢?腦袋一直慣用文明邏輯運作,真的反應不過來。
「我地好慘架,而家經濟唔好,又冇咩人搭的士,你外國人咁有錢。」司機一邊說,一邊還是笑孜孜的。
「對不起。」我已經把 3.5 歐元拿出來。
司機跟着我下車,繼續說:「7 歐唔得既話,咁你畀 6 歐我好唔好?6 歐都得架。」
我真的很好奇,司機怎麼覺得我會答應?我看起來那麼好心(或笨)嗎?
這樣的事情,我在希臘遇上了 3 次。
該怎麼形容希臘人,天真還是無賴?他們還沒有窮到冇飯開的地步,但每天只工作 6 小時,又窮死都要飲咖啡食捲煙,點算?
都係求財。
要耍無賴,定係好似日本司機咁,省靚啲架車,等人地畀錢畀得心甘命抵。香港嘅司機大佬,我明你地車租油錢有幾貴,供樓壓力有幾大。求財啫,大家都係,你地面對既,我地都面對緊。要求財,除咗瘋狂揀客,只接中距離和猛鬧粗口,應該仲有辦法。
(本文純屬作者意見,不代表香港01立場。)