打工仔靈魂　永垂不朽嘅叉燒飯

喺中環得一個鐘頭食lunch，暫時擺低office嗰堆十日十夜都做唔晒嘅嘢，同三唔識七嘅人搭住枱食，先至係食叉燒飯嘅精髓。

廣東菜博大精深，但我最喜歡的其實只是叉燒飯。

離開得香港愈耐，就愈喜歡；見到幅相就發癲，紅色油亮嘅外皮，有少少粉色又嫰嘅肉，好想食。

認識一位在紐約出生紐約長大嘅女子，23歲，父母都是香港人，每天練舞，唔打算選港姐，準備直接進軍娛樂圈。某一天回香港簽經理人，第一次吃到叉燒飯，筷子都唔識用，但自此驚為天人。在香港短暫停留的一個月，每天一碟，講得最好嘅廣東話係：半肥瘦叉燒。

最近與女子見面，她說，叉燒飯已經成為她死前最想食的食物。

曾經立志，身處咩地方，就食咩嘢。喺得三五度嘅巴黎街頭，得十五分鐘食飯，仲要食凍冰冰、咬完嘴角都損埋嘅baguette，真係好難頂。德國人食得最多嘅唔係豬手，其實係一堆薯仔，好多唔同種，mash嘅、切片嘅、酸嘅，咩都有。

從來都唔覺得自己係一個咁香港人嘅人，但原來口味，真係喺人嘅genes裏面。

我明白，喺紅鬚綠眼嘅地方搵香港食物，係找死。而家全世界都係中國人，但信我，搵到福建麵食同四川火鍋嘅機會仲高啲。

有一次，喺聲稱係華人社會裏面最civilized嘅城市——台北，見到好多話自己係香港人開嘅燒臘舖，全部都窗明几淨，門口仲掛晒膶腸同臘腸，心諗，應該掂。

充滿期待咁叫一份叉燒飯，上到嚟，咩事呢，係肉片？台灣文青可能唔明白「斬大舊叉燒」嘅意義，切到好似蒜泥白肉咁薄，即使將成碟飯嘅叉燒拼返埋，都只係等於大家樂叉燒飯上面兩舊半叉燒嘅量，好失望。

食叉燒就係要食大舊肉嘅感覺，唔好理咩卡路里，唔好理咩致癌唔致癌，大啖肉，大啖飯，理想嘅話應該再加大啖凍檸茶。啊台灣燒臘舖老細，切到咁薄，我連叉燒應有嘅焦香同甜味都食唔到喎。

上面仲淋咗一堆半咖啡色半透明嘅汁，好似點燒鵝㗎噃，我有啲嫌棄咁用筷子試咗一下，又見到旁邊嘅台灣人歡喜到汁都撈埋；再望住碟旁邊嘅豆腐乾同小唐菜配菜，我發現，我真係好掛住再興燒臘嗰一千零一條菜心。

香港朋友聽親都笑我：咩咁包閉，我地日日lunch都食㗎啦！係呀，日日都食㗎，所以你哋第日冇得食就知。

阿媽，對唔住，我最掛住嘅真係唔係蒸鯇魚同番茄炒蛋之類嘅住家餸。

一眾如我在外漂泊嘅香港人，身處冇china town，連中國超市都冇嘅地方，只好自己買鬼佬豬肉同barbecue sauce用oven整叉燒，記住要加豉油同好珍貴要慳住用嘅紹興酒，蜜糖就唔理啦，white clover咩都得。

我的Hong Kong Barbecue Pork連鬼佬friend都覺得好食，但佢唔明呢種象徵香港working class食物嘅重要意義。唔係大家好leisure咁配紅酒食，係要喺中環得一個鐘頭食lunch，暫時擺低office嗰堆十日十夜都做唔晒嘅嘢，同三唔識七嘅人搭住枱食，先至係食叉燒飯嘅精髓。

（本文純屬作者意見，不代表香港01立場。）