【踩過界．任噏亂評】蔡思貝繼續高分貝　扮火雞姐算似模似樣

偽美劇《踩過界》正式出街，以為擺喺星期六、日炮灰時段冇人睇？其實出街之前，已經夠晒Gimmick，畀人話似Marvel嘅《夜魔俠》，加上大量靚女「半裸」場面，反而仲多人想睇！睇完第一集，都真係不出所料，王浩信做嘅文申俠，角色設定真係夠晒「夜魔俠」，嗅覺、聽覺真係勁到有啲誇張。成個觀感嚟睇，色水、鏡頭真係跟足美劇，都睇得起碼TVB真係有心要變！除咗呢幾樣，好多人都話見到蔡思貝都話唔睇，仲話佢以前做戲太煩膠太嘈，就算王浩信幾咁好戲，都會熄機唔睇。於是抱住直闖勇者塔的決心咁睇咗一集，都發覺唔係好差啫，冇熄聲冇靜音，好自然睇到落尾。

最初睇到蔡思貝用榴櫣進撃王浩信子孫根嘅時候，不論佢說話嘅語氣、動作，貌似過咗火位。心諗乜監製咁大整蠱，明明蔡思貝個死穴係太嘈，太煩膠喎，今次仲要做麻甩女，想佢死多兩錢重？差少少做埋最慘烈嘅關公呀！但唔好鬧住先…公平啲睇埋落去啦。

未出街之前，好多人都話蔡思貝個look係倒模《食神》火雞姐，又哨牙，講嘢豪氣又盛，呢個都係冇可否認嘅事實，只不過人似火雞姐，樣似達哥咁解。（尤其側面同回眸！）之但係就算係抄，做得好唔好都係重點。話說第一集，見到蔡思貝眼神同行為都流露住對王浩信嘅愛意，可惜「神女有心，襄王無夢」，王浩信仲要玩「楚河漢界」，擺到明就係唔冧自己。不過蔡思貝秉承火雞姐鍥而不捨嘅煩膠精神，就算慘食檸檬，但因為夠雷氣，身為王浩信師爺嘅佢，一次又一次幫對方接case，明明畀對方劃清界線被hurt完，第二日都心軟衝上房交抵新case。老實講，呢種女仔係吸引嘅，之不過好易蝕底。再跳返出嚟睇，蔡思貝咁煩咁嘈咁煩膠，其實係符合人身性格呀，係make sense㗎，把聲嘈唔代表佢做得唔好。再睇返有幾幕蔡思貝哨住棚牙，含情脈脈咁望住王浩信，個幾下真係忍唔住笑咗出聲，真係做到醜女個feel，唔算夾硬chok出嚟。算係為《踩過界》咁黑暗嘅tone之中，帶嚟一種詼諧嘅感覺，係笑位。

如果要挑剔嘅話，就係戴住牙套咬字唔太清楚，但都情有可願。另一方面，其實蔡思貝可以再做得粗魯啲。有人可能會問：「唔係啩？仲想再幾粗魯？把聲仲唔夠尖咩？頂唔住。」把聲係天生，係不滅嘅事實，但個人認為係可以發揮嘅地方。就係因為夠麻甩夠粗魯，如果肢體動作再大啲，抬起腳冇咁似影model相，當自己喺屋企，咁樣麻甩味可以加多兩成。再利用一下聲線，變得巴渣少少，起碼個package會再完整少少。