【超時空男臣】蓋世寶離開兒童組變孤兒 合約剩半年:有心理準備

撰文:林通賢
出版:更新:
蓋世寶今日出席《超時空男臣》活動擔任司儀,活動上控制節奏得宜,相當得心應手。

《超時空男臣》首周平均收視24.5點,第一集試過最高27點,成績唔錯,對於很多觀眾來說,劇中最熟悉、最親切的不是蕭正楠、田蕊妮,而是劇中飾演姑姐的蓋世寶,由《閃電傳真機》《至net小人類》到《放學ICU》,蓋世寶當兒童節目主持18年,兒歌《小司機Noddy》、《魔法小美穗》陪伴過不少小朋友成長,她是繼譚玉瑛姐姐後,最耐的主持人,但2014年兒童組改革,蓋世寶由兒童組轉去劇集組,重新來過,以前每日穩定有工開,爆騷是基本,但現在連開工都隨時不足。

蓋世寶原來是真名,她自己都覺得名字有霸氣,但她擔心有人識名,但冇人知我個樣。

蓋世寶今日出席《超時空男臣》活動,更擔任司儀,雖然少做了主持,但今日在活動上揮灑自如,她接受《香港01》訪問時說:「我一直有心理準備,唔會一世做兒童節目,但最震憾係全部人都解散,嗰下感覺大啲,係㗎,人哋對我做兒童節目主持印象太深,當時根本就唔敢用我,好多人都唔知我由兒童組出咗嚟,但好彩出嚟嘅時候,監製潘嘉德俾機會我,我同佢講:『我出咗嚟,有冇嘢可以俾我參與下呀?』跟住佢安排我拍《拆局專家》,我好感激佢,之後有監製葉鎮輝、黃偉聲都有用我,我叫做吊到命囉。」

蓋世寶劇中飾演姑姐,為人踏實,低調,十足她本人性格。

兒童節目中的蓋世寶,口齒伶俐、唱兒歌同小朋友玩、完全冇難度,你會覺得她是主動的人,但她其實相當被動,即使她需要主動才可以在劇集組生存,蓋世寶都選擇被動,她說:「可能性格決定命運,大家見我做司儀好active,其實我好被動,唔識social,尤其敲監製房門入去傾幾句,我唔係介意,我自己都覺得唔舒服,『Hi監製,我係蓋世寶。』下一句我都唔知講乜喇,『得閒多多關照?』定係講『可唔可以用下我?』人哋都唔舒服啦。我好支持人哋咁做,我知或者有回報,敲門未必有機會,但唔敲就一定冇,我好明呢啲道理,但我真係唔識做,呢個係我個人問題。其實我都敲過㗎,有次周志康陪我,嗰次大家咁啱喺7樓(製作大樓)攞劇本,佢叫我敲下門啦,佢話呢啲真係要做㗎,嗰次我介紹下自己,但個監製冇咩反應,哈哈……其實我乜角色都唔介意,今次《超》劇角色好好,起碼有個名字,有時角色係同事A、B、我都唔介意,只不過係一個工作,最緊要有人搵我,我有工開。」

安德尊、蓋世寶、杜大衞、三位都曾經是兒童節目主持。

適者生存,尤其在大機構工作,蓋世寶不求上位,只求有工開,但原來這個願望要實現都不容易,她說:「或者我豁出去多啲敲門,可能會多啲收入呢,但我冇行呢步,咁我咪要承受呢個結果,因為我明白,所以平衡到自己心態,人人都有唔開心㗎啦,每個人都有煩惱,唯有自己去諗辦法囉,自己唔好諗到咁差,好多人喺無綫都有機會賺人仔,可能就係喺電視見過你,或者講唔出你嗰名,但就係認得你,因為有電視劇,但我喺電視劇就係唔穩定,所以冇人搵過我返去賺人仔,講真,大人真係可以唔睇兒童節目㗎,你做咗幾多年都可以冇人識,拍劇始終入屋,你就算睇過套劇,再喺街見到我,一時之間你都未必認得我啦。」
 

蓋世寶今年38歲,但依然keep得唔錯,心境保持開朗好重要。

蓋世寶人生最青春的時間奉獻了給兒童節目,現在在劇集組重新來過,她被動性格亦擔心自己前途,她說:「剩返半年約,其實有定心理準備,我唔知公司簽唔簽我,但係….我睇唔到前景呀,我有心理準備公司唔再簽我,可能佢哋見到我呢幾年都係咁。我唔會心淡,好多人都係咁㗎啦,由兒童主持到而家重新嚟過,我冇難過,因為預咗,形式係唔同兒童組,間唔中有一兩句對白,睇自己心情點tune啦,但我要嘅係騷,我要工作先至有騷還,我唔可以揀工作,我冇乜人用,唔通仲去揀咩?我而家簽緊一年五十幾個騷,但我而家得幾個咋。」

+1