【最緊要好好玩消暑版】小學雞IQ題攝時間 hea得過份笑唔出  

撰文:
最後更新日期:

由李家鼎(鼎爺)主持的《阿爺》廚房播畢後,緊接在同一時段播出《最緊要好好玩消暑版》,講個節目名都知是《最緊要好玩》的特別版,內容係乜?一句講晒「無聊當有趣」,其實《最緊要好玩》由2月開始,逢星期六播半小時,一播就半年,播出無耐已經負潮如潮,節目形式雖然是胡鬧搞笑,但上世紀《歡樂今宵》式笑話無論如何都是笑不出,但每星期半小時都不太難捱,勢估不到現時一連播五集。

區永權同莊思敏親暱仿如情侶,正在講婚禮事宜。(網上截圖)

阿Bob點晒頭,仿如將會充當婚禮司儀。(網上截圖)

最後阿Bob和莊思敏才是新人,其實觀眾一早估到。(網上截圖)

節目開始見到區永權搭着莊思敏膊頭,二人相當親密,一路講緊婚禮程序,而同場的阿Bob就點晒頭,當時觀眾已經估緊阿Bob才是新郎,但仍有一絲期待,希望會有點驚喜,最後無綫確是要令人失望,之後莊思敏坐回阿Bob身邊,二人才是準新人,由於不知笑點在那裡,所以要配上笑聲效果,似足廿年前的《點解咁好笑》。

鄧梓峰扮食人花,仲同林希靈、馮盈盈、劉穎鏇及張寶兒玩IQ題。(網上截圖)

幾位靚女問的IQ題,全是小學雞級數,令觀眾覺得睇緊兒童節目。(網上截圖)

鏡頭一轉,馮盈盈、劉穎鏇、張寶兒、林希靈去到一個估計是樹林的地方,為何是估計,因為係廠景,似足《閃電傳真機》同《至叻小人類》,之後「驚喜」出現啦,鄧梓峰竟然扮食人花出場,仲叫幾位靚女每人出個IQ題考下他,若然不懂回答,就讓其中一位離去,之後劉穎鏇最先出題「為何雀仔平時飛行用一小時,落雨要用兩小時?」鄧梓峰當然是不懂回答,答案是「雀仔落雨要拎遮,所以用一隻翼飛」,其後到馮盈盈出招「有東京、南京同埋北京,為何冇西京?」,答案又是小學生皆知的「因為唐三藏取咗囉。」觀眾只能說句「放過我吧」,確是相當小學雞。其實類似低智問題,大家只要在google搜尋iq題,已經有一大堆一模一樣的問題及答案提供,今時今日仍想憑這種內容留客?不了!

安德尊向江嘉敏問價,明顯是低級趣味。(網上截圖)

原來只係問手袋幾錢,想買給女兒。(網上截圖)

整個節目扣取廣告,剩餘21分鐘,除了無聊IQ題,其他就是搞笑趣劇,但全部是兩分鐘貨仔,內容有光頭阿Bob去洗頭、安德尊扮阿伯問價,被江嘉敏毆打,郭子豪求職面試要講有冇女朋友,整個節目除了胡鬧就是求其,笑料欠奉,對比起之前時段的《阿爺廚房》,完全不在一個檔次,而播完五集《最緊要好好玩》之後,將會播出陳貝兒主持的《嫁到這世界邊端》,講述香港女仔漂洋過海,嫁到去外國的生活,明顯有深度得多,今個星期觀眾還是早點休息,無謂浪費時間。

好懷念鼎爺的《阿爺廚房》,節目有深度好多。(網上截圖)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。