【G-1格鬥會】拳手蔡嘉燕暗寸對手扮病:過百拳淨係打眼

撰文:
最後更新日期:

比賽前一日,一眾參賽者去到海邊訓練,當時大家重有講有笑。

ViuTV真人騷《G1格鬥會》去年播出時是非多多,但都叫有收視。第二季最近拍攝中,8名參賽中,個個都大有來頭:洪拳、泰拳、田徑教練、動作特技員,要數,最削果個一定係45歲嘅麥家琪同20歲嘅偽AV女麥紫莉Chili,對拳擊完全零經驗。

蔡嘉燕在fb發言,似乎覺得有人講一套做一套。

成隊人早前去到日本訓練兼進行賽事,第一日賽事中,Chili被對手打到起唔到身,隨即嗌住咁被工作人員送到當地醫院。第二日賽事,36歲蔡嘉燕對打27歲何慈恩,雖然前者有十年空手道造詣,但對手5歲已經開始學習洪拳,兼且係劉家良徒孫,呢場硬仗真係一啲都唔易打。

於日本賽事被打到口腫面腫,蔡嘉燕話都係要返到香港之後,先去醫院檢查。

蔡嘉燕日前就喺facebook上載自己近照,只見佢兩眼又腫又瘀,唔知真係以為做完割雙眼皮手術:「記得比賽前一日,我哋一齊去滑浪,你不知是否因為不適應異鄉天氣,生病了!冇跟我一起去滑浪,一同享受,令我很擔心,滑得很不暢快,到第二日比賽,發覺妳仲生猛過泥猛,復原能力好強,冇法了,唯有硬食妳三個ROUND ,頭部中了過佰拳,爭少少被KO ,放心我無腦震盪,只係眼盪盪,不過都算好,過百拳都淨係打眼,都算就住!」字句間,似乎暗指對手扮病令佢留力,結果遭打到豬頭咁。而蔡嘉燕在文中亦提到何慈恩同佢講過「要俾人打先至識得還擊」,但結果「上到台你冇手軟還打得很主動」。之後更指可能因為無被打到起唔到身,所以工作人員未有為佢安排任何醫療,直到返港後自行入院檢查。

何慈恩現職為健身教練,於第一季《G1格鬥會》挑戰賽中,曾擊敗Hidy。

唔少朋友見狀後都戥蔡嘉燕不值,更指佢對人善良結果搞到自己周身傷,而為怕朋友擔心,蔡嘉燕就回覆大家表示「已經極速消腫!我是打不死無敵小神童!」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。