【早霸王】男友扮暗戀打上電台求愛 森美又中伏:我以為佢傻咋

撰文:
最後更新日期:

有聽開《早霸王》節目嘅聽眾,一定知道每逢星期五都有一個環節係代聽眾告白。繼之前同志「管家婆」同「勁過阿希」之後,今日又出現一位對手喇。話說有位人兄打去電台話要同一位女同事示愛,森美聽完呢位人兄故事後,都決定要幫佢,點知最後係俾人呃,傾左半個鐘先知原來係「求婚電話」!森美今日接受《香港01》電話訪問時表示,「咁我口講緊係話佢,但心底裏當然係多謝佢,因為人地都係欣賞你節目,分享人生重要一刻,我都祝福佢!」

森美今日係《早霸王》中,被一個感動淒美愛情故事呃到。

呢位人兄就話今次打電話係因為同女同事相識100天,之後有講到為了解對方多一點,不停向同事打探近況,早幾個星期仲做過一件事令森美非常震驚,「中間發生左一件好『甘』嘅事,搞到我都想放棄。因為佢本身識溜冰,有次就約左班朋友諗住係溜冰場送花俾佢示愛。都搞到好大陣仗,去到最後撻q。搞到佢媽媽都知我呢嗰舉動,我都識佢媽咪,所以都諗住搵佢到溜冰場參與嘅。」森美聞言後就驚訝地話,「你唔係求婚wor,叫埋人地阿媽嚟,你係咪有事呀?你係咪傻架?」呢位人兄就指女同事嘅媽咪後來就通知女兒發生呢件事,「因為佢媽咪本身對我認識唔深,佢媽咪知道呢件事之後就驚一陣搞到咁大件事,一陣我嗰女真係要同你拍拖,所以最後佢媽咪就同嗰女講左。而女同事知道之後有同我講,話要考慮。」

每逢星期五《早霸王》,都有一個環節係幫聽眾告白。

其後森美就打俾女方,幸好女方有聽電話仲話知道身邊都有男仔鍾意佢,森美之後就接住問單身咗左幾耐,女方支吾以對地說,「我唔係單身㗎。」森美聽到之後即刻大叫話,「吓!」女方接住話自己有男朋友,「拍咗6年拖,感情都好穩定。我地都就嚟結婚,我男朋友仲要都好鍾意你。係咪玩我㗎?」森美聽到之後就話,「我就唔知喇,既然你有男朋友,咁就唔接暗戀你個個人入嚟喇。留意下身邊啲人,差唔多結婚之前就試多幾個男仔喇,未結婚就唔好綁住一個。希望你同男朋友繼續恩愛。」收線之後,森美笑言,「我話你聽,你唔好係佢男朋友呀,如果唔係一定咒你呀!咒你爛蘿柚爛到上肚臍。」之後呢位人兄再被駁入節目,仲一路奸笑,最後被森cut線!

問到森美聽到溜冰場嘅故事,真係唔覺得自己俾人呃?森美就話,「我又無喎,以為佢傻咋。始終我接過咁多嗰電話,乜人都有,真係唔出奇,你要相信呢嗰世界千奇百趣。」森美其後講到女方在電話中表示其身邊有男仔鍾意自己,他笑言,「分分鐘唔係打黎個個男仔,而家變捉老鼠入米缸。衰啲講句,自己攞嚟!」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。