錄音甩晒beat被張敬軒鬧爆  泳兒嚇到呆咗:未見過張敬軒咁惡

撰文:
最後更新日期:

今日(16日)係泳兒(Vincy)生日,早前唱片公司同事就搞咗個驚喜生日會,由於之前的surprise party都被Vincy識穿,所以今年她的助手特別緊張,早三個禮拜已經開始準備。上周五,Vincy到張敬軒錄音室為第四隻Hi-Fi碟錄音,錄音期間軒仔勁驚忍唔住笑,在外面panel說:「真係冇得挑剔㗎喎。」、「佢唱得一take比一take好喎。」不過為咗玩爆Vincy,軒仔刻意挑剔她甩beat,之後仲影帝上身嬲爆咁走出錄音室。

原來係假嘅,泳兒又點會甩beat啊。

企喺度呆咗的Vincy一臉茫然,事後她說:「好驚,未見過張敬軒咁惡。之前同佢錄另一隻歌佢都會讚我,今次好似令到佢好失望。佢啲戲真係實在太好啦,明明我自己有數緊beat,但係佢令到我都開始唔相信我自己。」Vincy仲話軒仔出咗去的時候有諗住追出去,「諗住同佢say sorry,但我都嚇到有啲呆呆哋,都唔知點做。我有一刻懷疑自己係咪發緊夢,我喺度諗:『點解全世界都喺度鬧我嘅?』哈哈。」後來同門師妹陳凱彤(Lillian)捧住生日蛋糕,跟一眾同事衝入錄音室大唱生日歌,嚇到Vincy黐咗埋牆,最後搞到Vincy又喊又笑。問到生日正日點慶祝,Vincy就話:「今日正日生日男朋友請我去旅行!」

生日快樂啊泳兒。

師妹陳凱彤(Lillian)送上生日蛋糕。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。