【TVB台慶50周年】向綠葉們致敬最抵讚 佢哋先係無綫真正基石

撰文:
最後更新日期:

每年台慶不外乎載歌載舞,演趣劇,抽獎派錢,中間穿插一啲當年流行話題人物,咁又一年啦。近幾年香港電視業起咗翻天覆地變化,有一堆默默耕耘多年嘅三四線演員被高薪挖角,一時間大家先醒覺,劇集唔可以每一套都同一個主角,但身邊配襯綠葉,卻能每套都出現並起了重要作用。來到50周年台慶,終於有一個環節特別向一眾Hidden Hero致敬,TVB終於醒覺?

憑住「講呢啲」成為萬能KEP,以及一日死幾次,劉江同羅樂林成為網民熱捧之選。(陳順禎攝)

萬千星輝賀台慶節目去到中段,有一個環節叫「福祿壽 Hidden Hero」,由阮兆祥、王祖藍、李思捷「二次創作」扮演三位荷里活超級英雄話要侵佔TVB,羅樂林、歐瑞偉、劉江三位近年爆紅嘅綠葉走出嚟保護娘家。單睇介紹佢地出場嘅片段,配上BOB旁白其實頗有心思,對話中帶出佢地為演出7日7夜不眠不休亦有用心設計。不過格硬要歐瑞偉跳舞,仲有劉江「FREE STYLE」RAP到甩晒BEAT就唔太識笑啦。

歐瑞偉一向有武功底子,打戲當然流暢,但要佢跳舞就好似為增加笑點而設。(陳順禎攝)

還好原來呢個環節仲有後著,借由三位去帶出一班,觀眾會好熟悉但未必叫得出名嘅綠葉,御用秘書何綺雲、忠心跟班楊證樺、最佳街坊蘇恩磁、戴耀明、有陰謀嘅鄭子誠、入行超過40年嘅韓馬利、老頑童秦煌,仲有胡楓同羅蘭。打工除左希望做好自己嘅崗位,都會希望得到公司重視認同,喺台慶夜佢地可以有少少時間分享幾句,雖然短暫但總算係剎那焦點所在,呢次安排絕對值得讚賞,如果能夠趁機改善佢地嘅待遇,TVB先真正能做到收復人心做番一個良心電視台。

大家未必叫得出真名,但對於佢地嘅樣貌同演技都絕對有深刻印象。(影片截圖)

「如果太多韓瑪利」呢首二創歌曲,出自韓瑪利本人把口更為親切。(陳順禎攝)

最熟悉的羅蘭姐修哥,以及忠心好同事楊證樺。(影片截圖)

+7
+6
+5


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。