胡鴻鈞頒獎禮《星夢》出身 頒獎禮表演都要咪咀:個表演好睇就夠

撰文:冼燕珊
出版:更新:

胡鴻鈞同譚嘉儀今日出席「慈善星輝仁濟夜」記招,兩位星夢歌屆時一定會上台表演啦,不過今次唔會好似之前咁,佢地喺《萬千星輝頒獎典禮》上面嘅合唱環節彈琴竟然係冇插線嘅,因為佢地話今次唔會再自彈自唱喇。

胡鴻鈞今次唔會表演自彈自唱。(梁碧玲攝)

同Hubert講起咪琴咪唱件事,佢都忍唔住尷尬咁笑,佢話:「好持平咁講,當時有份演出嘅係以演員為主,為咗成個表演好睇啲,所以選擇用呢個方式去表演,其實佢地綵排果時都好努力,好力求完美,將自己最好的一面表現出來。」仲話希望大家喜歡佢地嘅演出,唔知Hubert呢個解釋大家又收唔收貨呢?

胡鴻鈞話當晚大家好努力綵排。(梁碧玲攝)
譚嘉儀話好享受個表演。(梁碧玲攝)

同場嘅嘉儀就好淡定咁講:「其實我好享受成個演出,因為綵排時間比較倉促,大會驚我地太辛苦,要練琴練唱,所以先有咁嘅安排。」不過經一事長一智,嘉儀就笑住話:「下次我地一定記得插返啲線。」咁記得插線但駁唔駁電先?