【平安谷】殺入星夢同菊梓喬爭唱主題曲? 胡琳:多謝Herman搵我

撰文:
最後更新日期:

TVB新劇《平安谷之詭谷傳說》,又講女權又講鬼故,被放喺新年前所謂炮灰檔,估唔到收視都唔錯,有成25.5點,觀眾仲普遍正評話會繼續追睇。戲中有大量女演員發揮機會,主題曲當然都搵番女歌手唱啦,不過就唔係近一兩年包辦劇集主題曲嘅菊梓喬或者吳若希,反而係靚聲之人胡琳﹗佢接受香港01訪問時就話:「多謝Herman﹗」莫非真係舖路入星夢爭一姐?

《平安谷之詭谷傳說》講女權主義,女演員喺戲中有好多發揮空間。(影片截圖)

無綫電視劇集主題曲由星夢歌手主唱,近兩年幾乎成為定律,雖然有時主要演員都可以佔一席位,好似羅嘉良唱《與諜同謀》主題曲、王浩信唱《踩過界》主題曲,不過真係極少數例子。呢個星期熱播《平安谷之詭谷傳說》,聽到一把較陌生嘅聲線,睇埋片尾先發覺原來係入行已經12年嘅胡琳主唱,真係嚇一跳,加上呢首歌係星夢製作,唔通胡琳準備加入?

眨下眼胡琳已經出道12年,不過一直好似比較出世唔多宣傳,普遍觀眾對佢認識唔熟。(胡琳Facebook)

2017年加入星夢後,菊梓喬幾乎包辦九成TVB主題曲,年尾仲拎埋2017年勁歌金曲頒獎典禮 - 最佳演繹女歌星。(資料圖片)

我地就呢件事走去搵胡琳問個明白,佢接受訪問時就話:「今次唱到平安谷主題曲唔存在鍊贏任何人,係TVB真係俾咗好多機會我地,其實Herman真係好好,係音樂界老前輩,好耐之前已經知道佢喺呢行好有經驗,佢好熟悉每一個歌手嘅聲線,有份唱主題曲好大原因係Herman眼光獨到,因為我把聲講真好適合唱呢種風格嘅歌,雖然準備時間唔係好多,但表現都算唔錯,俾80分自己,希望今次唱完第一隻,之後有機會唱第二隻啦。」

胡琳一向以靚聲見稱,呢排睇劇聽歌都覺得特別動聽。(胡琳Facebook)

眨下眼胡琳今年已經出道12年,不過大家對佢印象一直都係發燒碟歌手,除咗有把靚聲其他都唔太清楚。至最近呢大半年佢頻頻現身TVB,做主持仲有份拍台慶劇《溏心風暴3》,飾演唐文龍(Nic)妻子Daphne,胡琳都話好感恩:「當然同我轉新公司有關啦,佢地好努力幫我爭取唔同嘅機會,可以促成到呢啲工作我都好感恩。亦真係感受到TVB劇集入屋威力,依家去買餸同去按摩,無化妝都有人走埋嚟同我講有追劇,自己睇到好激心,真係多咗好多人去關注自己。」

不過問到佢會唔會簽約TVB呢?胡琳就話:「依家同公司仲有好長約,亦都幾滿意依家嘅工作量同發展方向,份約仲有好耐,暫時都唔諗住啦。今年工作上暫時都要忙演唱會先,其實方面工作暫時都可能會Hold一Hold。」

之前喺台慶劇《溏心風暴3》,飾演唐文龍(Nic)妻子Daphne,令胡琳即時感受到入屋威力。(胡琳Facebook)

+5
+4
+3


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。