【棟篤特工】編劇爆星爺創作秘技 李思臻:佢連標點符號都會細執

撰文:林通賢
出版:更新:

過新年一定要看周星馳,相信沒有人反對,《家有囍事》、《行運一條龍》、《西遊記》等,即使重播N次,對白已經背得滾瓜爛熟也好,依然好笑過現在所有笑片,《楝篤特工》編劇李思臻,之前幫星爺寫了《西遊伏妖篇》《美人魚》,和星爺一起工作了六年,每次開會都十個八個鐘,星爺係點?佢應該好清楚,安排這次訪問的朋友,一直提醒要問關於《棟篤特工》,但我真的忍不住,究竟偶像是否如《食神》的史提芬周一樣,似地獄來的使者,還是似《破壞之王》的阿銀,宅心仁厚,但相信大部份星爺fans最想問的是,「點解星爺唔再有幕前演出?」這個問題李思臻為大家問了「我私底下有問過呢個問題,但佢反問我,你覺得我有咩角色可以演呢?」有呀!奸角未演過喎,不過星爺做奸應該都好搞笑。

星爺拍戲一定親身示範一次給演員,羅志祥亦要跟足星爺的動作演繹。

【棟篤特工】做星爺御用編劇要考牌 李思臻:佢叫我返去寫3場戲

【棟篤特工】黃子華爆10大製作秘聞 「佘詩曼本來係搵我開劇先」

曾跟星爺合作的,很多都不歡而散收場,令很多人以為他就是《食神》入面的史提芬周,難以相處,但李思臻就十分欣賞星爺對電影的熱情,「佢個人幾friendly,只不過比較慢熱。初頭半年我哋度劇本,真係好正經咁坐喺辦公室對住,大家只係傾劇本,半年之後就咩都講,佢見到報紙發生咩,都會同我哋分享下......佢係電影痴,未見過一個人咁投入做電影,下晝兩點叫你開會傾劇本,傾到8點,叫你一齊食飯,一邊食飯一邊傾到11點,就叫大家返去再諗下啦,可能大家有個point諗唔到,聽日大家公司見啦,跟住第日返公司一坐低,佢一坐低就講『尋晚果個point,我諗到喇』,佢唔止一次係咁,成日都係咁,如果佢開一套戲呢,除咗訓覺嗰幾個鐘之外,基本上佢所有時間都係諗劇本,返到屋企好似唔使瞓咁,第日又同我哋講『我尋晚睇咗套戲,點點點,你哋返去睇下啦,有參考價值。』你會諗點解呢個人咁多時間?其實做電影就係佢最大嘅娛樂。」

很多跟星爺合作的都不歡而散,但李思臻談起和星爺一齊度橋的日子都是開心的。

子華、星爺最肯聆聽:唔出聲係專心聽你講嘢

李思臻能夠和黃子華、周星馳合作,真的令不少人羡慕,他不想比較二人,但他認為兩位都有一個共通點,就是肯聆聽「佢時不時會叫其他導演、編劇上嚟傾下計交流下,因為唔同人有唔同角度,可以刺激到創作。所以有啲唔係太熟嘅人,以為星爺唔出聲,其實佢係專心聽緊你講嘢,會唔會某一個point,某一句有用呢?」有很多笑匠,私下其實不懂玩笑,但李思臻就表示星爺為人風趣「試過同一個笑話,我講一次,俾佢再講一次係好笑好多㗎,你就會發現佢真係天才。」

《棟篤特工》7日收三千萬,李思臻擔任編劇,他覺得子華和星爺都有相同特點,就是肯聽人意見。

編劇愛不斷加料來豐富劇情,但李思臻透露星爺愛用「減」法來寫劇本,「好多時度劇本,有咩就加哂落劇本度,星爺都係咁,有咩加哂落去先,但到最後佢就減,有咩係真正有用呢?幫助劇情推進呢?佢要劇本簡單但要精緻,故事越簡單越好,但每一場要做到最盡,呢樣嘢同星爺合作後,好影響我係創作上嘅方向,同埋佢真係勤力囉,連星爺呢啲天才都咁勤力,每日不眠不休咁磨嗰劇本,我哋呢啲凡人,仲點偷懶呢?其實度劇本同做人一樣,簡簡單單但做好每一樣嘢,做到佢極致就得㗎喇。」

星爺雖然擔任導演工作,但每一個演員的演出,他都要演一次,相信對體力消耗相當大。

可能是完美主義,令星爺不再有幕前演出,李思臻更透露星爺在片場其實很攰「佢同我講過做導演已經好攰,佢再要演埋就更加攰,佢拍戲嗰陣,佢係成套戲所有角色都演一次,只要鏡頭出現嘅,就算係臨時演員,佢都會教佢做反應,親身做一次俾佢哋睇,拍《美人魚》有次好記得,所有人準備緊一個鏡頭,我就見佢攞住個劇本企埋一邊,合埋眼諗緊經咁,我就行埋去睇下咩事,聽到佢諗緊成場戲所有人嘅對白,佢係度執緊呢句對白應該點講呢?節奏係點呢?佢係細緻到連標點符號都要計埋嘅人,例如:『點呀?今日食咗飯未?』嗰呀字拉長少少,又會係點呢?定係將佢改為今日食咗飯未呀?佢每一句對白都研究。」

發表評論...