林峯當年究竟係太CHOK 定係金曲金獎太沉重？
林峯有新歌！雖然佢喺MV仍然好chok，但諗諗而家幫無綫唱主題曲嗰班人，再聽聽林峯嘅歌聲，我想講：「如果唔係TVB，其實佢無得輸。」
新歌名為《Reunion》，屬劇集《飛虎之潛行極戰》之主題曲，有MC Jin幫手rap，都幾夾幾有新鮮感。歌曲風格唔行熱血、正氣、陽剛、拚搏精神路線，而係煽情嘅旋律有種出生入死兄弟情，一切盡在不言中嘅feel。呢嗰感覺，「無奶油」聽唔出，就算堅係feel唔到，睇睇歌詞都get得到，諸如：「We fight as one」、「有啲嘢係唔使講大家心照，一班兄弟簡直同一個心跳」、「我哋之間只有兩個字，兄弟」。
除此之外，我硬係覺得套劇最終會有個好感人、好錐心嘅結尾，例如某某好樂天、好正氣、好有觀眾緣嘅主要角色最後犧牲咗。唔單只因為歌詞話「就像我跟你們從沒有別離」、「之前所有嘅誤會當粉筆字抹走佢」，更因為林峯把聲唱得出懷愐嘅感覺，有種刻骨銘心、難以磨滅嘅痛。簡單啲講，唔知點解聽住林峯唱《Reunion》，個腦會浮現《烈火雄心II》紀德田（王喜飾）嘅死、《火海豪情Ladder49》Jack Morrison嘅殉職，以及《飛虎雄心》大石（王敏德飾）嘅犧牲。
讚到咁，唔敢講一啲私心、偏見都無，因為從來唔覺得歌手身份嘅林峯唱得差，愈舊嘅劇集主題曲更加係愈正，唔信可以聽吓《記得忘記》、《真愛難共》、《忘記傷害》。但，大概係2011年左右，點解林峯會成為被瘋狂恥笑對象？點解有人覺得佢啲歌好聽，唔敢讚？點解有鍾意佢，唔敢認？
相信好多人會話因為佢隻歌《CHOK》。的確，當時嘅林峯係chok得over少少，不過諗下喎，做星梗係要chok㗎啦，你著件衫好睇啲，都會selfie幾張或者行步路都快啲啦，係咪？所以chok無罪，最大問題係無綫當時因為太鍚林峯喇，將2011年嘅《十大勁歌金曲頒獎典禮》金曲金獎塞去俾佢，結果.......如果當時係俾容祖兒《花千樹》或者王苑之《水百合》，古巨基《爆了》等，就真係唔同晒，不過呢個世界冇如果，發生咗就係發生咗。
希望事隔咁多年，香港人又被逼學咗咁多年「包容」，不如都包容一下當年嘅CHOK峯，嘗試欣賞吓林峯嘅歌，雖然上唔到神枱，但K歌嚟講都唔差吖，更何況今次仲有MC Jin加持添。