BOB林盛斌入行15年突然感觸眼濕濕:我知道冇可能取悦所有人

撰文:
最後更新日期:

近年BOB真係接JOB接到手軟,去到邊都會見到佢。(林盛斌Facebook)

近年無論睇電視、聽電台、睇廣告、甚至去婚禮同公司周年晚宴,都成日見到BOB林盛斌嘅身影,真正做到「這裡有你那裡有你……」真係緊有一個BOB喺左近。好多人佩服佢轉數夠快、襟撈、做到面面俱圓,但唔少網友對佢有無限批評甚至人身攻擊時,BOB一樣坦然面對,有時間嘅仲逐個留言回覆。呢日佢忽然寫下長文:「不經不覺,今日,係我入行15年。」

人前永遠都係開心果,但其實BOB都會有情緒有累嘅時間,只係平時收藏起嚟。(林盛斌Facebook)

BOB呢日忽然寫下長文,分享入行15年心情。(林盛斌Facebook)

BOB近年嘅工作量可以用相當嚇人嚟形容,齋睇佢Facebook分享,真係一日有72小時都唔夠用。喺觀眾面前永遠以開心果形象示人嘅BOB呢日忽然感觸起嚟,原來03年4月1日,正正係佢入行嘅日子,剛好來到第15個年頭:「回想自己過去咁多年,無論係電台、電視台、電影到出面撈嘢,做主持、做司儀為咗有效果、為搞氣氛,通常會去玩吓人、笑吓人、寸吓人,搗吓蛋,拍劇拍戲做d角色唔係仆街,就係冚X剷,又成日扮鬼扮馬、核核突突、肉肉酸酸咁,自己又冇樣冇款冇才華,淨係聲大大冇貨賣,講真,真係未必個個都會接受同鍾意。」

為咗節目需要,BOB從不介意扮醜,只為搏觀眾一笑。(林盛斌Facebook)

就咁上網搜尋「BOB林盛斌」,大家不難發現唔少批評聲音,夾雜粗口之餘仲鬧晒佢全家,呢啲留言其實BOB都一一睇到,有時仲會逐個回覆:「有時都會心諗:嘩,咩事咁大仇口呀?好彩嘅係亦有好多人喺唔同嘅平台留言支持,好多喺街度見到會同我友善打招呼合照……寫到呢度突然有少少眼濕濕..... 其實,真係好幸運,好感恩有你哋,衷心,感謝曾經為我打過氣嘅每一位,亦感謝曾經打擊過我嘅,因為你哋,亦令我好好反思自己,繼續推動自己。我知道冇可能取悦所有人,我只好盡力去做好自己。」

為咗家人努力工作,咁忙依舊會抽時間享家庭樂,絕對係一個好爸爸。(林盛斌Facebook)

BOB太太亦隨即轉載留言,表示無論以前定係未來都會一直陪伴左右。(林盛斌太太Facebook)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。