【逆緣．專訪】夏文汐自覺同黎諾懿姊弟戀好Match：我Keep得好好
夏文汐（Pat姐）同黎諾懿喺《逆緣》裡面嘅終極忘年戀真係好引人入勝，最近兩集癌病復發嘅諾懿病情愈嚟愈嚴重，到尋晚諾懿就終於頂唔順，要求Pat姐抆走佢個氧氣罩，而Pat姐亦喊住送老公一程，最後更獻上告別之吻，場面真係好令人動容。不過，一直以來都有觀眾話呢Pair情侶有啲重口味，但Pat姐就覺得成件事其實好靚，佢接受《香港01》訪問時就咁講：「好Match喎！年紀從來唔係問題嚟，最緊要係思想夾。依家咩年代呀，唔係仲咁落後呀？有幾個明星嘅老公都細過老婆好多啦！」
【爛鬼Cult噏】《逆緣》夏文汐17歲拍《烈火青春》：只係尺度大膽
【爛鬼Cult噏】夏文汐《烈火青春》電車情慾戲都關土地問題事？
講到原來係Pat姐「欽點」黎諾懿演佢老公，佢就話：「無論係外型、高度都好適合呢個角色，其實仲有幾個選擇嘅，但係都係佢最好。其實好多方面嘅嘢我都有份畀意見。」講到7年前佢同陳偉霆拍嘅《出軌的女人》又係姊弟戀，之前又有人話佢戀上小鮮肉，問今次嘅姊弟戀係唔係佢出嘅主意，佢笑住咁答：「你以為我真係姊弟戀上癮呀？其實都係角色需要啫，同後生仔吸引嘛，咁我都Keep得好好吖，點算重口味？如果真係重口味，《出軌的女人》重口味好多。」
好多人都話拍TVB劇好辛苦，問Pat姐點解會肯接呢個角色？佢就話其實TVB好就佢作息時間，每日都起碼有7、8個鐘瞓：「肯接最主要係因為劇本好正，同樂小姐（樂易玲）識咗好多年，有一次返咗香港High Tea，佢就問我拍唔拍劇，到我同監製（王心慰）傾完，佢就話可以為我度身訂造個角色。我同個角色好吻合，又係明星，又係為咗感情而息影，都係80年代尾退出，所以可以話今次嘅演出係緣份嚟。」又指自己好開心可以同黎耀祥、林夏薇等合作：「我喺美國時成日都煲祥仔嘅劇！好開心可以跟佢學嘢。」
【逆緣．專訪】黎諾懿沉十年再上位 知自己位置：最緊要去到終點
【逆緣．專訪】黎諾懿馬壯味濃難洗走？ 「我同佢一樣貪玩賴皮」
點擊下圖重溫Pat姐同陳偉霆喺《出軌的女人》嘅激烈床戰：