【收收埋埋】家底厚又會話你知？　盤點無綫6位隱形有米港姐　

周星馳都講過，做人如果冇夢想，同條鹹魚有咩分別？但係冇錢點敢諗夢想，只要贏在起跑線先係王道。無綫藝人都以人工低見稱，但仍然都有唔少藝人都甘心留喺無綫奮鬥，就好似「38億千金」黃翠如咁，爸爸係上市公司主席。其實除咗翠如之外，仲有好多藝人家底相當雄厚，可以話個個都係「富二代」，可能怕被講是非，所以個個都禾稈冚珍珠，有啲仲估佢唔到！

1. 趙希洛 - 住8千萬半山豪宅

無綫「御用癲婆」趙希洛2007年參選港姐，雖然五強止步，但就入咗藝員訓練班。其實趙希洛家中富裕，爸爸係澳洲大律師，有指同時喺澳洲經營石油生意，喺香港至少擁有合共一億五千萬嘅物業。趙希洛自細就喺英國留學，決定返港選港姐後，父母就將八千萬半山豪宅供囡囡入住。

2. 朱千雪 - 兩物業揸手

2012年港姐季軍朱千雪都係圈中嘅富二代，8歲就跟家人移民到加拿大，畢業於西門菲莎大學（Simon Fraser University），有指千雪家做五金生意，19歲嗰時爸爸已經分別送咗兩層位於小西灣藍灣半島同愉景灣物業畀千雪。到拍攝完《EU超時任務》之後，冇經濟壓力嘅千雪就重返校園喺中大修讀企業傳播管理碩士，現正修讀緊香港城市大學法律博士。

3. 陳凱琳 - 5千萬舖頭收租

被譽為「近十年最靚港姐」嘅2013年港姐三料冠軍陳凱琳家住九龍塘五千呎過億獨立屋，雖然參選時，陳凱琳好謙虛話自己來自中產家庭，但有消息指陳凱琳爸爸陳桂祥係「鋪王」，坐擁十幾個物業，更手持三個超過5千萬嘅商鋪收租。

4. 王卓淇 - 老竇開廠生產護膚品

身為2014年港姐亞軍嘅王卓淇喺《果欄中的江湖大嫂》入面嘅演出眼前一亮，家底原來同樣雄厚。爸爸係護膚品生產商，喺內地經營廠房，參選港姐前，家人將王卓淇送到英國修讀經濟，之後再轉到完成碩士學位。雖然只得24歲，但已經手持大角咀一號銀海同廣州白雲區600萬物業。

5. 張寶兒 - 夾埋至少有3億身家

張寶兒2016參選港姐奪得「友誼小姐」之後好快被網民起底，原來張寶兒生於大富之家，爸爸喺禮頓山擁有多個物業，夾夾埋埋至少有3億身家。張寶兒之前接受訪問嘅時候都有講過屋企人好錫自己，亦唔需要為屋企放棄想做嘅事，你話贏在起跑線幾咁重要。

6. 雷莊𠒇 - 傳聞指老竇持過億物業

2017年度港姐冠軍雷莊𠒇被網民取笑為顏值低，不過樣貌決定唔到一切，最緊要家底好。原來雷莊𠒇嘅爸爸係香港十大傑出設計師雷葆文，身家非常富有，除咗香港之外，海外都擁有不同物業，有消息指總值過億，同時喺商界有頭有面。