【世界盃】阿根廷輸波16強止步 死忠杜汶澤輸身家:要暫停出糧

撰文:
最後更新日期:

俄羅斯世界盃正式進入16強賽事,首兩場阿根廷對法國,以及葡萄牙對烏拉圭已經劇力萬鈞,最終兩位球王C朗及美斯都無法力挽狂瀾,齊齊16強出局搭飛機走人,C朗同美斯固然難掩失望之情,忠實球迷亦相當傷心。杜汶澤原來一直係阿根廷粉絲,呢場16強賽事一個決定,應該令佢一世難忘啦。

杜汶澤依家人在新加坡。(杜汶澤Facebook)

阿澤喺賽前貼上12年前舊照,相片中肥肥白白嘅佢著上阿根廷波衫,留言話:「你睇呢張2006年舊照,就知我咩(支持邊隊)啦!我仲記得當年做有線電視世界杯主持,響九展有個靚媽媽著住英格蘭球衣,拖住個四歳左右嘅細路女,佢好嬲咁同個女講:「認住呢個忍呀!壞人嚟咖!」之後仲怒啤我一嘢先走。個細路女今年應該有十六歲喇......」

想當年著住阿根廷波衫嘅阿澤,真係肥肥白白。(杜汶澤Facebook)

仲會記得八六年阿根廷國家足球隊,仲著緊LeCoqSportif而唔係Adidas,就知阿澤有幾Die Hard。明明人在新加坡阿澤都有keep住睇波,唔止睇仲有賭。踢到凌晨12點完場後,阿澤就喺自己公司facebook page留言話:「作為八十年代過氣嘅阿根廷迷,自從馬勒當拿退役之後已經放棄咗足球嘅杜生,今日飲大咗,將成副身家(即係今個月公司所有伙計嘅人工)買咗阿根廷贏。」

阿澤留言話自己飲大咗,將全副身家買晒阿根廷,然後輸晒。(杜汶澤Facebook)

小賭就話怡情啫,玩到賭身家咁大件事,仲話:「本公司宣報暫停出糧直到另行通知。」有網友提醒阿澤唔出糧屬犯法行為,不過之後見到佢上載一張托頭看似苦惱嘅相,show出手錶成張廣告照咁,瞓醒又再去開懷大吃,輸身家應該只係講下笑啫。

呢隻手錶都值三幾萬嘅,未去到輸身家咁嚴重。(杜汶澤Facebook)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。