【走進世界各式天牢】60獄卒對700犯人 囚犯窮到要食老鼠
一個有近7百名囚犯，但只得60名獄卒嘅監獄到底會係點（有一半係零裝備）？位於中美洲嘅洪都拉斯素有世界謀殺之都，每月有超過4百人被殺，再加上毒品、搶劫、暴力時有發生，令當地嘅監獄人滿為患。Netflix節目《走進世界各式天牢》主持人Pual Connolly冒著生命危險深入洪都拉斯嘅丹利監獄，短短幾日令佢大開眼界。
Pual Connolly步入監獄後隨即被搜身，不過呢個步驟連底褲都唔使除，令佢覺得十分兒戲，更笑言可以暗藏武器，不過，原來好戲在後頭，因為當佢進入囚房範圍之後，隔即被兩名協調員帶去到另一個地方，並要求佢將所有衣物除下進行搜身。由於呢兩位協調員只係囚犯，令Pual Connolly不禁懷疑到底佢哋點解可以咁做。其實喺丹利監獄，由於犯人過多，所以獄卒只能委派囚犯做協調員管理內部秩序同收吓風，而每位協調員身上都備有刀、棍等武器。
Pual Connolly之後被帶去見總協調員，二人對話前，Pual Connolly被要求下跪，情況有如與國王會面一樣，但實際上呢名總協調員只係一名殺人犯。「如果你身上有錢，可以買床位，不過都要有床賣先得，如果唔係你就要瞓地下，一張無床墊嘅床係135美金。」此乃總協調員同主持人Pual Connolly嘅對話，呢位領導人仲話如果無錢的話，就只能靠洗地、倒垃圾、洗廁所賺少少……講到賺錢，監獄內仲設有小食部，由囚犯所經營，每月都要交租比總協調員再轉交比監獄工作人員。由於無經費關係，除咗得一半獄卒有裝備之外，就連犯人嘅伙食都嚴重受到影響，總協調員表示捉到乜就食乜，當中包括老鼠……
喺丹利監獄，妹仔（囚犯）確係大過主人婆（獄卒），早年獄卒曾經想奪回主權，為咗下馬威而進行囚房檢查，結果一入房就被毒打，最後仲差啲變成暴動……咁到底獄卒作用是什麼？咪就係寫報告囉，呢份報告好重要架，因為會影響囚犯嘅權利同埋出監時間，相信亦都係因為咁，囚犯大多聽教聽話。