【女人四十】卓韻芝搭結婚尾班車　連環爆金句：我覺得閃婚好正常

近年轉戰文字同舞台的卓韻芝，在大眾眼中一向我行我素。曾經公開自己是雙性戀的阿芝，在與老公初次約會後，就被求婚，而佢亦爽快答應。不止外界大表驚訝，就連田蕊妮都對這位好友閃婚的決定表示難以置信。雖然社會不斷進步，但有些傳統觀念依然好影響女性嘅睇法，譬如：「40歲前唔嫁冇得嫁？」當大家以為阿芝是趕尾班車結婚，但其實佢對婚姻有自己一套睇法。

「我覺得閃婚好正常，閃離先係唔正常。」

40歲被視為女性的分水嶺，有人是「老中女」，有人是「美魔女」。今年39歲的卓韻芝，作客阿田主持的《女人四十》，被阿田評價為一位有勇氣的嘉賓。阿芝今年2月在新書低調宣布與男友訂婚，男友求婚沒有浪漫情景，只有電話裡的一句「我要娶你。」，就令阿芝立刻答允。

「你唔可以忘記婚姻係兩個家族嘅結合。」

每個女仔出嫁都希望自己有個完美的婚禮，但在阿田眼中，阿芝就算結婚，都不會搞婚禮。不過阿芝不止舉行婚禮，更做足禮儀習俗，包括過大禮。什麼原因？阿芝話：「嗰個一定要做，做俾婆婆，做俾對方屋企人。」阿芝最親的家人就是婆婆，難得的是「閃電俠」氹得婆婆好開心，婆婆更當正佢乖孫一樣！

「婚姻就係大媽舞？」

好多人話結婚係墳墓，但阿芝在節目中就坦言與老公相處有一種好輕鬆自在的感覺，還舉了一個大媽跳廣場舞的例子來說明：「婚姻就係各自有一個大概嘅舞步，各自有一個方向係大家認同嘅，其實係各自跳緊，但係唔緊要，冇話對錯，最緊要係你有冇享受。」

「婚姻個誓詞係我見過寫得最好嘅其中一段嘢。」

結婚誓詞是西式婚禮中，新郎、新娘向對方公開宣告的承諾。節目中重播阿芝在婚禮上宣讀誓詞的片段，一讀到自己個名，佢已經忍不住眼濕濕，重提這段誓詞，阿芝就讚結婚誓詞寫得非常好：「佢將人生每一個處境包含曬，貧賤富貴，生老病死，每一個字都係一個處境，人生就係嗰D處境。」

「你做一個有意見嘅女人，就會好似係一個三八咁樣。」

卓韻芝06年因為母親離世及與當時男友的相處問題而服藥自殺，幸男友趕至。重新振作後，佢積極發展自己的事業，找屬於自己的愛情，更大膽承認自己是雙性戀。現今越來越多女性大膽表達自己的睇法，但好多時都會被人為意見多多，就連老公一開始都認為阿芝是一個「八婆」，不過相處之後，就自然會欣賞阿芝大膽敢言的一面。

初次約會就答應男友的求婚，雖然在外界看來是一時衝動，但見到阿芝與「閃電俠」有幾甜蜜，就知道這個決定是對的！