黃翠如傻大姐又靚女卻一直單身 只因身邊閨密都是好兄弟?

撰文:
最後更新日期:

蕭正楠黃翠如終於開花結果。(視覺中國)

「多謝你令我學識照顧人,令我學識點做個更好嘅男人」蕭正楠於《萬千星輝頒獎典禮2018》舞台上,公開與黃翠如已婚喜訊,並許下愛的承諾,成為全晚最感動一刻。網上瘋狂洗版高呼so sweet,喺廣告時間蕭生蕭太亦受到全台上下送上擁抱及祝福。到底翠如有咩吸引之處,可以收服老公嘅心,兼喺圈中可以有咁多知心好友?

蕭生蕭太情深一吻,全台上下以至網上都一致送上祝福。(葉志明攝)

+3
+2

最無殺傷力的傻大姐

傻大姐是女仔唔會討厭,男仔可以同佢玩到攬頭攬頸,個個話佢會係好女友好老婆,但偏偏未遇到其真正幸福。黃翠如入行多年,由娛樂記者到旅遊節目主持,鄰家女孩外表加上爽朗性格,一向深得網友喜愛。跳到TVB後機會不斷劇接劇,雖然攀升速度太快及演技惹爭議,但無損其親和力。由初入行一起打拚的有線幫,到TVB花旦唐詩詠、田蕊妮,老一輩陳榮峻吳香倫,均視翠如為知心好友。

入行15年以來,翠如一直都係傻大姐性格,加上少女外表,完全睇唔出已經37歲。(黃翠如IG)

娛樂圈中其實每一位都係對手,但翠如就係有種吸引力,令男女都無法討厭佢。(黃翠如IG)

細個時同學之間一齊玩,但慢慢地男女會分開玩,女仔如果多男性朋友,有時更會惹人非議。但傻大姐翠如出名好多男閨蜜,除咗最佳拍檔洪永城,合作過嘅對手好似袁偉豪、森美、周栢豪、黃宗澤個個都玩到勾肩搭背,甚至今年係成為蕭太後首個生日,老公蕭正楠會約埋一班男閨蜜幫太太慶祝生日。或許就係翠如嘅毫無機心真誠待友,先能夠真正體現男女之間真係有純友誼。

同翠如合作過嘅男星,都會成為好兄弟好閨蜜。(視覺中國)

翠如婚後首個生日,老公安排一眾男閏蜜為佢慶生。(蕭正楠IG)

應該你我身邊都總有一個好似翠如咁嘅女仔 -- 外型不俗性格爽朗,世人看來黃翠如完全係好女友代表,但多年來一直單身,身邊只有一個友達以上戀人未滿嘅洪永城,直至2013年尾入劇組開始拍《師奶Madam》,遇上生命中注定嘅另一半蕭正楠。

二人嘅緣份,由拍攝《師奶Madam》開始,愛情未萌芽時拍結婚場面仲有少少拘謹。(視覺中國)

到《幕後玩家》時,已經成為公認嘅一對。(視覺中國)

+12
+11
+10

雖然剛開始時捲入一啲是非當中,但真愛的確可以衝破一切挑戰難關。從來浪漫激情最引人入勝,但平淡幸福先係最細水長流。翠如同蕭正楠拍拖時,除咗係戀人亦係摯友,面對另一半唔需要裝模作樣。翠如亦絕不介意素顏拍拖;除咗綿綿情話,喺公開場合會互相挖苦取笑對方,對男士來說呢種感情關係最為舒服。

情侶檔出席活動,翠如會不避嫌高舉Fans手牌為男友打氣,模樣傻得可愛。(視覺中國)

兩個人既係戀人亦係最好嘅摯友,做訪問時可以互相挖苦,唔使就住就住,呢種相處模式的確最為舒服。(視覺中國)

蕭正楠經常以「我的XX」形容翠如,早以成為不可分割嘅共同體。翠如生日可以約一大班男友人慶生,但會準備別具意義嘅蘋果蛋糕送俾壽星女,愛屋及烏對翠如嘅愛犬視如己出,佢地公開戀情而不高調,恰到好處地分享生活逸事,時不時喺IG放閃,大大增添外界對佢地嘅好感。

雖然女友大情大性,但蕭正楠其實將翠如捧在掌心疼錫,生日時訂製別具意義嘅蘋果樹蛋糕,真係SWEET到暈。 (黃翠如IG)

幸福是留給那毋忘初心的兩個人,呢兩年佢地經常孖住現身,每次都會被催婚,佢地心裡面亦早有打算。當蕭正楠精心安排於過山車求婚但計劃失敗後,翠如居然主動爭取幸福出口求婚;飛到外地簡單結婚,連戒指都係鄉村小市集買一對用餐具整出來嘅小戒指,只因婚姻最重要嘅,就係兩個人一齊,正如翠如所講「那一刻,我們什麼也沒有,但我們擁有了對方。」就係如斯真性情嘅黃翠如,佢終於得到幸福,大家又點捨得唔為佢送上祝福呢?

唔需要華麗嫁衣盛大婚禮,戒指亦只係鄉村市集臨時購買,但對蕭生蕭太來說,有對方喺身邊,已經係最美滿嘅婚禮。 (黃翠如IG)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。