【向西聞記】與趙永洪樓梯激戰 牛雜妹不抗拒一夜情:why not?

撰文:洪曉璇
出版:更新:

繼《反黑》之後、再有港產電視劇於Netflix上架,12集《向西聞記》前晚舉行首播禮後,呢日輪到由趙永洪及李美琪(牛雜妹)主演嘅新單元《食女性地嘉亨灣》宣傳。戲中趙永洪飾演一個時薪38 蚊嘅保安員,搭上豪放港女牛雜妹,仲去到後樓梯大戰連場。

《向西聞記》其中三個單元包括《咖喱雞》的張建聲和陳意嵐、《PTGF&PTBF》的陳安立和沙律 ( 張沛樂 )、《食女性地嘉亨灣》的趙永洪和李美琪 ( 牛雜妹 ) ,同導演吳兆麟齊齊開 facebook live 暢談拍攝點滴。

向來乖巧嘅牛雜妹首次扮演豪放女,可謂耳目一新:「好開心今次導演咁大膽搵我做一個豪放女,令人睇到㷫烚烚,後樓梯嗰場戲,我拍嘅時候好緊張,因為戲入面我要主動錫趙永洪,手部游走佢身體不同部位,好怕唔小心掂到佢,俾佢以為我想非禮佢,哈哈。但經過導演親身指導示範,加上對手嘅配合,場戲總算有驚無險順利完成。」提到一夜情速食文化,牛雜妹就話:「我唔特別贊成或者反對呢件事嘅發生,愛情上我係幾典型嘅水瓶座,非常憑感覺,如果感覺到而大家都係單身,why not?」

提到感情世界速食文化,牛雜妹就話自己感覺行先,如果大家都係單身亦唔介意一夜情。

戲中趙永洪拉牛雜妹去後樓梯激戰,佢話角色反映現今年代嘅「飲食文化」,但拍呢場激戰戲絕不好受:「拍嗰時又熱又侷,但演員有呢個好處,正常你唔會做嘅嘢,演戲就有機會俾你感受吓,其實都幾鬼驚,寧願上番床好過。」現今唔少男人靠把口呃女上床,趙永洪則覺得此風不可長:「真的假不了,假的真不了,大話始終係大話,有一日會穿,呃人唔好做呀。依家網絡資訊太氾濫,要自己分清楚邊啲係真同假,如果唔係都好大鑊。」

趙永洪笑言拍攝親熱戲看似好有艷福,但實際上有苦自己知。
+5