【再開演唱會】葉德嫻為食言解畫 自嘲︰姣婆守唔到寡囉！
撰文：葉衛青
出版：更新：
（左起）葉德嫻、倫永亮和趙增熹下月舉行演唱會，3人忙於排舞練氣外也不忘接受訪問。
葉德嫻(Deanie姐)、倫永亮及趙增熹日前三人接受有線「樂壇第一手」節目主持熊卓文訪問，三人未開唱先放笑彈，Deanie姐被重提3年前曾揚言不再開演唱會，而今何以食言？她自嘲說：「姣婆守唔到寡囉！」
問及Deanie姐對於兩位拍檔有何品評？她表示：「倫永亮是扮豬食老虎，他份人好似豬咁論盡，同你出街食嘢，不是踩到你隻腳，就是倒瀉嘢；不過論盡之餘，他好有諗頭。至於趙增熹是這個騷嘅老闆，做老闆梗是要有老虎性格啦！」倫永亮聞言即說：「唔早講，陣間食咗我點算呀？」
趙增熹（右）笑謂完成演唱會後，將籌備3人開棟篤笑。
開騷在即，三人忙於排舞練氣，趙增熹還特別在郊區物色單位讓Deanie姐練聲，Deanie姐謂：「自己住城市，嗌大聲少少都驚畀人誤會吊緊頸，所以咪去郊區囉！」說時Deanie姐忽然爆料：「倫永亮是有錢人，他住山頂，屋與屋之間隔好遠，練聲好呀！不過諗諗下，打你劫仲好！」
Deanie姐還笑罵倫永亮多年來都偏心林憶蓮，儘管倫永亮否認，Deanie姐依然扮受氣說：「我知！十隻手指有長短呀嘛，我明的！」倫永亮沒好氣反擊道：「唉，單身女人胡思亂想搞到思覺失調，大家原諒她啦！」而Deanie姐不諱言話︰「本身性格得罪人多稱呼人少，希望今次和倫永亮、趙增熹合作，彼此不會因對工作的執着而影響大家的友誼。」趙增熹還笑謂完成演唱會後，將籌備3人開棟篤笑。