【包青天.專訪】張振朗被天降橫禍負傷拍劇︰呢套劇唔係咁容易拍

撰文:
最後更新日期:

從八年前完成無綫藝員訓練班後出道到現在,張振朗的星途似乎並不是一帆風順,近來,有份「擔正」主演的劇集接二連三被抽起,被外界封「地獄黑仔王」,不少網民或朋友都替他感到不值,或許也是因禍得福。直到近期有份主演的劇集《包青天再起風雲》播出,距離上一套出街的《踩過界》至今,足足有兩年時間,好像諸事不順,但張振朗卻有他的一套處事哲學,他笑言有經歷才有得著。

剪接︰呂志豪

攝影︰陳順禎

短片︰李偉軒

場地:桔梗

演展昭的角色,當然也少不了大量「打戲」,而騎馬的戲份也少不了,張振朗也坦言自己也墮了幾次馬。(劇照)

決心做一個不一樣的展昭

在《包青天再起風雲》中,張振朗飾演經典角色展昭。講起展昭,筆者想起的一定是由何家勁在1993年《包青天》中的那個展昭,張振朗也不例外,也有這個想法,而他指自己接到角色的時候,心想「唔係啊話,張振朗?做展昭?」既然很難打破大家對何家勁演的展昭的概念,就不如直接用另一個切入點去揣摩和演繹,「你會見到我依家呢個展昭係五品帶刀侍衛,而何家勁嗰個呢係四品帶刀侍衛,換言之就係喺成為大家心目中嘅展護衛之前嗰個展昭。」所以他演的是類似少年版的展昭,而在劇集裏面,他是在慢慢成長。他又說︰「佢哋(編劇)想我調皮啲,想我活力多啲,其實佢哋喺個劇本上面都賦予咗好多畀我,譬如你會見到展昭唔識字啦,佢係文盲,佢會打輸畀人啦,你以前唔係見到呢啲嘢㗎嘛,同埋佢會追女仔追輸啦,即係你會見到好多,展昭喺以前係一個神嚟㗎嘛,依家佢就變咗個『人』究竟會係點樣呢!」

張振朗也直言拍《包青天再起風雲》的難度非常高。(陳順禎攝)

+5
+4
+3

而且拍《包青天》時挑戰重重,張振朗說︰「我記得因為我係兩套劇疊住拍嘅,我拍完《堅離地愛堅離地》凌晨3﹑4點收工,我都會去做運動做gym,做到朝頭早6點嘅時候,我再接去開工,我經歷咗呢一後好長嘅時間,我想為一個角色去付出一啲嘢。」卻突然被一個天降的帳篷所傷,「我去同幾個朋友食飯嘅時候,突然間天台一﹑二樓有個戶外活動嗰啲6支鐵腳嘅一大個帳篷從天而降,樓下有間餐廳全部都係人,打唔中佢地,飛咗過黎我呢邊,我避唔到,我即刻瞓左喺地下,成個壓中我條腰。嗰時我第一時間諗『死火,我拍唔到呢個角色(展昭)!』因為我郁唔到,我打唔到,我所有心血都無晒,嗰刻好唔開心。」雖然他被迫休息了幾個月而無法繼續健身,不過還好,公司將打戲搬到最後才拍,先帶傷拍文戲,所以可能解釋了現在為什麼網民會指他演的展昭太瘦。種種障礙加起上來,令他感嘆︰「呢套《包青天》唔係咁容易拍!」

對於「黑仔」的說法,張振朗堅信︰「點樣去睇嗰一件事呢,其實係取決於你自己用咩態度。」(陳順禎攝)

抱樂觀態度看「地獄黑仔王」之稱

連續幾套劇因為不同原因而被抽起,包括《機場特警》和受「安心事件」影響的《堅離地愛堅離地》和《牛下女高音》,三劇都是他做男主角,因此外界不知從什麼時候開始,給他起了「地獄黑仔王」的名字。對於連串的事件,他直言︰「唔開心一定有,咁辛苦去拍幾套劇集,都唔開心咗個零禮拜,即係我自己本身都係一個幾樂天同埋正面嘅人,咁我又會覺得好少可喺TVB度能夠有三套劇可以連續出唔到街都係一個幾特別嘅嘢,我覺得一個演員需要好多經歷,你先可以演到一個角色,呢啲就係上天畀我嘅一啲磨練。」《包青天再起風雲》出街,代表張振朗終於有劇出街,他也坦言,很多記者朋友恭喜他。而且趁沒有工作的時間,他跟屋企人去了旅行,也算是得著,所以「黑仔」與否,還是取決於個人態度。

張振朗自言天生較樂天,「瞓醒就會開心返」!(陳順禎攝)

初入行經濟困難︰「有一段期間,唔敢同人出街食飯」

張振朗在2006年曾與洪卓立及沈震軒參加《英皇新秀歌唱大賽》,不過被淘汰,2011年畢業於無線電視藝員訓練班後一年就正式加入TVB。捱了八年,首套「擔正」做男一的《堅離地愛堅離地》卻被抽起,回想這些年的時光,他坦言也捱過辛酸的日子,最實際的,難免要數衣食住行方面,他指自己剛入訓練班時,收入只有四千多元,扣除往返住處屯門和將軍澳公司的路,收入只餘下一半,他談及跟師兄師姐吃飯的一次經歷,本來以為只是吃茶餐廳,怎料他們帶他去了一間較高級的餐廳,一個午餐也要百多元,他說︰「然之後我已經『唉,大獲啦,月頭咋喎,咁我月中咁點算啊?』咁我好記得我係連嗰個凍飲要加2蚊嘅呢,我都唔夠膽加,跟住之後啲師兄師姐見到嘅時候,話『嗌啦,我畀啦。』,都幾……即係你話好慘又唔係好慘嘅,但係一個經歷囉,咁我記得都有一段期間,唔敢同人出街食飯,啲朋友約會唔敢出去㗎,盡量慳得幾多得幾多。」凌晨也不想花錢搭的士,要搭公司車到旺角再轉小巴和捱麵包等他都試過,但他指如果沒有這些時光,就不會像現在一樣時時警剔自己不要亂花錢。

傷癒後,張振朗瘋狂健身,練得一副好身形。(Instagram@owencheung)

笑看「假Chilam」的稱呼︰「我係想行張振朗嘅路」

張振朗常常被指像哪位男星,從一出道被指是「翻版黃黃宗澤」,到後來因在2014年《Sunday扮嘢王》中扮張智霖(Chilam)更受觀眾認識,張振朗直言有人會罵他「死假Chilam」,也有人在街上會叫他Chilam,對此,他覺得︰「點解佢哋會覺得我似呢?就係因為當年我扮嘅時候,即係我真係做到嗰樣嘢啦,我冇可能好似忘恩負義咁,我當年扮佢就得,依家畀人笑吓就唔得,所以我覺得OK嘅,同埋我知道自己做緊乜嘅,我係想行張振朗嘅路,我喺台上面嗰年攞男配角嘅時候,我喺台上面講過『我唔要做任何人嘅翻版』,我就係要做張振朗。」《踩過界》中的Gogo就令更多人知道他不只是「翻版Chilam」,亦因為傑出表現而首次獲得《星和無綫電視大獎2017》「我最喜愛男配角」。

張振朗希望做一個出色的演員。(陳順禎攝)

向外界坦認感情 不會刻意去避

除了劇集播出外,外界關心的無非是藝人的感情消息,有很多藝人選擇「地下情」,不想曝光,張振朗卻不是這種,他指自己一向都好坦白承認跟女友楊偲泳(Renci)的關係,也從來不會刻意去避,他說︰「我出街我都光明正大就咁出街,因為咁我都係人嚟㗎嘛,我都要出吓街食吓飯,我都想拍吓拖㗎嘛,我又唔係做緊啲唔見得光嘅嘢,我點解要去避呢。」不過他就講到暫時未有結婚打算,他說︰「大家都仲後生嘅時候,都好想拼命去做好自己份工作先,自己嘅工作永遠擺第一,我哋喺身邊係互相扶持大家,大家向嗰個目標出發咗先,呢個係我哋共同嘅觀念嚟嘅,咁so far都幾舒服,咁同埋我又會覺得我一個男人,即係你又冇車又冇樓嘅時候,你點樣畀到安穩你另一半啊,你一個男人起碼都要咁樣先講求婚啦,所以嗰啲就容後再談啦。」

+11
+10
+9


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。