【12個夏天】張振朗謝東閔炎夏遊西班牙 點解40度要着大褸?
撰文:鄺鈺瑩
出版:更新:
無綫旅遊節目《12個夏天》集合陳家樂、 連詩雅、張寶兒、張曦雯、羅天宇等人主持,分別遊歷五個國家,感受不一樣的夏天。昨晚(20日)播出第一集由張振朗、劉穎鏇同謝東閔一齊去到西班牙,節目一開首,張振朗已經話:「講到西班牙嘅夏天,一個字:熱。閒閒哋都4、50度,不過佢哋偏偏覺得熱先有feel,所以就連仲夏節都要搞返個營火會迎接夏天……」
節目中,3位主持人介紹百年歷史的聖米蓋爾市場,介紹冷湯之餘,又推薦當地消暑特飲Horchata,似乎真係熱到隨時會中暑一樣,但奇就奇在劉穎鏇、謝東閔同張振朗喺節目中,無論喺大街定小巷,全程都著上外套,同身穿小背心、短袖衫嘅路人顯得格格不入,尤其係本身以短褲襯白t-shirt外加簿身長恤衫嘅張振朗,喺如此高溫下,都堅持要著外套,到底係怕曬定係怕凍呢?
再細睇,三位主持嘅外套都係來至Columbia,以及節目尾聲時嘅鳴謝部分,明晒!原來係贊助。TVB嘅廣告植入手法近年已經玩到層出不窮,藝人不時都成為人肉廣告牌。雖則今次三位主持身穿外套仍正常舉動,但其實喺炎夏著成咁,都真係辛苦晒3位啦。
+6