方健儀4歲起住公屋 望搞冬菇亭派對:我不折不扣係一個沙田友

撰文:林迅景
出版:更新:

前無綫新聞主播方健儀日前(17/10)為頒獎典禮擔任司儀,接受《香港01》訪問時,就表示近來多集中於香港工作,不外乎是主持、司儀以及廣告。問到會否如舊同事梁凱寧一樣,到斯里蘭卡義教,她就回答說:「呢五年我都有做好多唔同嘅慈善工作,最令我印象深刻嘅係兩年前,去咗埃塞俄比亞,因為奧比斯有個10K跑,嗰時仲去探訪過一啲埃塞俄比亞嘅家庭。」表示親身去體驗會有更深感受。

方健儀公開表示自己是屋邨長大,以住過公屋為榮,即時受到廣大網民讚好。(葉志明攝)

早前方健儀在Facebook上提及自己是公屋長大的,訪問中她也說起不少回憶。「我4歲開始就已經住喺沙田,中學小學同埋大學都係喺沙田,所以我不折不扣係一個『沙田友』。一講起自己住新田圍邨,身邊好多朋友就話自己都係,個感覺好開心。我成日都諗,應該喺沙田自己住果條村搞個party,不過一路都唔敢做,因為冇入嚟就會好糗,哈哈哈。(想搞咩類型party?)冬菇亭,因為大家生活都係離不開食蛋撻、食西多士同飲奶茶!」她更表示,這個派對若能夠舉辦成功,希望大家賞面。

方健儀表示想搞沙田冬菇亭派對,邀請大家一同緬懷過去。(葉志明攝)