【萬千星輝2019】周嘉洛奪獎後登熱搜:我會努力令大家認識我!

撰文:
最後更新日期:

《萬千星輝頒奬典禮2019》昨晚(12日)終於圓滿結束,憑處境劇《愛.回家之開心速遞》中飾演「廢青」金城安一角而深入民心的周嘉洛,首次提名「最佳男配角」就成功擊敗對手,奪得殊榮。

入行4年的周嘉洛,憑處境劇《愛.回家之開心速遞》中飾演金城安一角奪得「最佳男配角」。(梁碧玲攝)

現年24歲的周嘉洛首次入圍《萬千星輝頒奬典禮》經已有四個提名,分別是「飛躍進步男藝員」、「最受歡迎電視拍檔」、「最佳男配角」以及「最受歡迎電視男角色」,最終一擊即中奪得「最佳男配角」,他坦言相當驚喜:「呢個獎完全意想唔到,知道自己有好大進步空間,我一定會繼續努力,直到我可以孭得起呢個獎為止。我會施展渾身解數去做好每一場戲,因為能力越大責任越大,大家畀咗呢份榮譽我,我唔會令大家覺得後悔嘅!」

周嘉洛奪「最佳男配角」後,「周嘉洛」三個字馬上登上各大搜尋榜。(梁碧玲攝)

頒發「最佳男配角」後,「周嘉洛」三個字馬上登上各大搜尋榜,可見亦不少網民對他感到相當好奇:「我好明白,其實我參與嘅劇集入面,我嘅代表作只係得《愛.回家》,所以廣大觀眾認識我都係金城安,未必有人認識周嘉洛,但我相信只係時間嘅問題,我會繼續努力令大家認識我!」

周嘉洛表示希望今年能在有限的框框尋求突破。(梁碧玲攝)

周嘉洛在《愛.回家》將金城安「廢青」的一面演得入型入格,但真正的周嘉洛又是如何的呢?他笑言確實有少許相似的地方:「我自己講嘢嘅神態、語氣各方面其實都同金城安好相似,因為始終係處境劇,我會擺多咗自己嘅嘢落去,所以嗰啲節奏、或者動作上嘅設計我都擺咗好多我自己本身周嘉洛嘅嘢,但係如果話處事態度,或者係處理人際關係抑或生活嘅態度,或者會有啲分別嘅,呢一刻嘅我會認真啲,平時同朋友玩就會似金城安嘅!但係我覺得輕鬆啲都係一種生活態度,容易啲滿足,容易啲有樂趣,都冇壞。」

周嘉洛(左)笑言《愛.回家》是一個能讓他好好磨練演技的地方。(梁碧玲攝)

周嘉洛坦言暫時未有挑戰新角色的想法,今年仍會以安守自己金城安的身份:「需要磨練嘅點都,始終《愛.回家》呢個溫室係一個好完美等我去每日磨練出街睇到自己有咩可以好好改善嘅地方,所以我好珍惜,一定會好好繼續努力做好。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。