【早霸王】男聽眾表白加求婚半年搞掂 突然對男人有心跳感覺?

撰文:
最後更新日期:

男聽眾半年前喺節目表白成功,半年後再喺節目求婚。(影片截圖)

男聽眾阿強今早打去《早霸王》嘅「你知道唔知道有人掛住你」,表示求婚,仲話自己半年前曾在《早霸王》表白,之不過,當森美話想重溫表白內容時,阿強就話怕尷尬,唔想身邊啲人閒言閒語,森美於是問:「咁你又打上嚟?」阿強表示因為節目喺佢哋開始嘅地方,所以想喺呢度開展新階段,並謂:「其實我打算一步一步來,呢個係少少承諾、一個開始 ,之後就會逐步實現求婚的過程。」之不過,最好笑問到半年前到底點識呢位女朋友,阿強竟然拒絕回答,激到森美問佢係未痴咗線。

不過其實男聽眾並無直接承認自己係亂世情侶。

喺阿強好誠懇咁話「我想求婚,你比我講啦,好唔好?」後,森美終於「放行」。之不過,阿強嘅一番言論都幾令人震驚:「因為最近我同佢唔覺意透露咗,見到一啲男人會有心跳感覺,佢好驚,覺得我會離開佢。跟住佢好驚好擔心,老遠咁走嚟我屋企去安慰我。」點安慰呢?聽到森美笑笑口咁話「呢啲只可以用肉體安慰」,阿強又再怕羞仔上身,叫大家唔好再講。阿強之後提到自己喺過去一年,因為見到社會動盪而感到不安,抑鬱有復發跡象,幸女朋友及時察覺加以照顧。亂世情侶半年前確實係出現過喺《早霸王》之中,之不過當時男聽眾自稱阿聰,而佢要表白嘅對象係喺交友apps所認識嘅女教師。

【早霸王】男聽眾交友apps識女老師 表白既甜又有意義連森美都讚

男聽眾突然有基的疑惑,但佢又話好肯定自己性取向。

阿強準備求婚雖然係開心事,但佢認為社會咁多人受苦,而自己享受幸福好似唔係咁好,為此,森美加以安慰:「呢個世界總有人不快樂,佢不快樂目的係為咗你可以享受快樂,你要咁諗,佢痛苦先有價值,唔係要全世界悲傷,佢哋揀呢條路去保衛你,你應該要更享受快樂同開心,佢嘅付出先有值得。」電話接通女主角阿琪後,阿強好快咁講出早已準備好嘅對白,:「呢半年經歷好多嘢,希望所有人可以心懷希望,或者將來有一日可以喺無黑暗地方見面,可唔可嫁比我?」女主角只係用咗一秒時間就話「好」。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。