【後生仔傾吓偈】丁子朗翹股有市場：入行到而家都一直係賣弄屁股

最新一集嘅《#後生仔傾吓偈》以「男人的身材」為題，仲請嚟丁子朗、鄭衍峰做嘉賓。講到身材，戴祖儀一開場就大讚丁子朗屁股十分吸引。「拍《娛樂大家》時佢無論著邊條褲都好翹 ，好想打佢pat pat，真係超正。」丁子朗之後以深蹲嘅方式嚟展現自己屁股有幾翹。

見到丁子朗個pat咁吸引，鄭衍峰同馮盈盈就話：「你戲路方面又多個選擇喎，專賣弄pat pa去吸引女士嗰一類。」話口未完，估唔到丁子朗竟然話：「我由入行到而家都一直係賣弄屁股。」呢一句說話好有幻想空間喎！其後丁子朗補充表示拍《森美旅行團》時已賣弄過一次屁股，之後又話最理想嘅身材都係同屁股有關，並謂：「識做GYM嘅人唔會練胸同背，而係練屁股或腳，因為屁股或腳嘅肌肉最近男士的重要部位，會刺激多啲睪丸素，可以用增強肌肉。」