早霸王|痴心女聽眾暗戀20年欲表白 點解森美最終竟然拒絕 ?

撰文:
最後更新日期:

女聽眾Fanny今日本身打算透過《早霸王》嘅「你知道唔知道有人掛住你」表白暗戀多年嘅對象,本身成件事都幾浪漫,但最後竟被森美勸阻,並寄語「愛佢就放佢走」,點解會咁呢?

女聽眾暗戀對方多年,直言對方了不起。雖然期間曾與別人拍拖,但都不及暗戀對象好。(影片截圖)

Fanny表示15歲時因為報讀一個課程而認識身為導師嘅佢,亦曾在17時向對方表白。「當時係衰咗,應該係身份問題。我已經都40歲啦,近排知佢仲未結婚,覺得自己有機會。」Fanny表示由於認識暗戀對象嘅屋企人,所以不時都會知道對方嘅生活同感情狀況。「佢哥哥知道我情況,所以就俾咗佢電話我,呢半年開始WhatsApp。」

但原來女聽眾一直都只係暗暗地戀,無任何實際行動。(影片截圖)

暗戀咁多年,連電話都要透露第三方先得到,到底係Fanny太含蓄,定對方神聖不可觸及呢?就連森美都忍唔住話:「你而家好似當咗郭富城係老公咁」指Fanny將暗戀對象偶像化,但Fanny就解釋係想給予大家空間,又認為少聯繫係好事……呢個邏輯似乎早已注定了戀情會無疾而終。而森美亦指出「你可以愛佢,但喺佢角度嚟講,你只係一個好普通嘅人。」

電話傾唔夠3日就被對方封鎖……態度都好明顯。(影片截圖)

Fanny又指自己表白有夠獨特同創意,認為自己有勝算,但亦透露同對方溝咗3日,就被對方封鎖WhatsApp。「我本身plan好晒要同佢傾咩,不過佢一直都無回我,直到第三日佢一次過回我,話唔鍾意我,同請我唔好繼續煩佢。我有講返自己對佢感覺,又講好可惜點解唔可以一齊……」原因真係好簡單,咪就係唔鍾意囉。愛情專家森美指出:「重點唔係你等、愛佢幾耐,呢啲唔係好重要,重要係你同佢溝通咗幾耐。你諗幾浪漫都好,佢係感受唔到,你情濃時,佢都要感覺到情濃。你而家係單戀,同你鍾意郭富城一樣。」聽完分析,Fanny直言非常灰,森美指一段愛情的存在唔一定要開花結果,仲反問Fanny如果迫對方鍾意自己,是否會更灰。

森美最後都無幫女聽眾打電話。(影片截圖)

Fanny最後不得不承認灰,並謂好心痛。森美最終都唔肯幫佢打呢個表白電話 ,並加以安慰:「你要知道你愛佢,佢唔一定要愛你。如果佢封鎖你,你唔應該搵佢。你而家係想自己開心,你係愛自己。如果你愛佢就放佢走。」暗戀多年嘅感情被森美一語道破,Fanny十分失落,但亦表示會接受森美建議由悲傷中走出來,再投入一段新感情。



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。