星級日日瘦│陳自瑤39歲猶如少女 公開秘訣:好習慣對女人好緊要
撰文:洪曉璇
出版:更新:
誰說結婚產子後一定要變肥師奶?剛剛39歲嘅Yoyo陳自瑤有「最索人妻」之稱,最近一輯花仙子婚紗照令人睇到另一面貌。入行近20年樣貌身形都無咩變,Yoyo接受《香港01》訪問時話:「依家大約23吋腰98磅,人生中除咗大肚,最重100磅。」
+11
陳自瑤一直以來身材未有太大變化,對比出道時,依家身材曲線更S更有女人味。Yoyo接受《香港01》訪問時話:「自己其實無專登去KEEP,可能因為本身自己飲食習慣影響,由細到大都唔太會食零食飲汽水呢啲垃圾食物,定時食三餐同水果,可能呢啲習慣已經某程度上有幫助。自己一啲都唔細食,不過少食多餐。」
少食多餐都好容易跟,Yoyo提到一個重點就係,女士們養生真係好緊要:「平時都係飲水、蜜糖水,好少飲凍嘢,因為凍嘅食物飲品好易積聚濕氣,令成個人好似水腫咁,特別對女士對子宮唔好。自己都有睇書自學養生,好似肚腩大其實可能因為消化問題,或者身體多濕氣,我會喺屋企按相關穴位,同埋自己做艾炙,真係肚腩都細啲。」
至於運動方面,Yoyo就話較少進行劇烈運動:「帶氧運動未必成日做因為怕傷膝頭,但會KEEP住拉筋同伸展運動,有時間就做瑜伽、打拳,慢跑快行,通常比較溫和嘅運動。喺屋企開電視播片跳舞,比較開心又無咁悶。」
+31