李克勤重提《舊歡如夢》舞步被取笑：其實我係好認真去跳

李克勤日前接受澳門YouTuber加葱訪問，更再提一次「送禮勤」事件，當加葱口窒窒地「代觀眾」問「你你你你你你你點睇送禮勤呢個名」的同時，克勤處之泰然，感覺似問問題的人比克勤更尷尬，李克勤說：「你知呢啲偶像嘅嘢，好難要求佢哋將所有Fans，咁當時我嘅身份就係Fans啦，將所有Fans送嘅嘢放喺佢哋博物館嘅，大家都明啦，都係一個儀式嚟啫。咁呢個稱號係娛樂到觀眾嘅我又唔太介意，當然喇，呢個唔係一個好難聽嘅稱號，因為你要知道，設計呢個稱號出嚟嗰份報紙，可以有好多比呢個『送禮』嘅名更難堪一百倍嘅（稱號）出嚟嘛，所以佢哋對我已經唔錯喇！」

提到克勤被取笑的事件，除了「送禮勤」之外，相信各位觀眾都會聯想到《舊歡如夢》的舞步。李克勤出道初期以唱情歌為主，所以當年《舊歡如夢》的舞步實令觀眾非常驚訝，更指其舞姿突兀，時至今日仍然被網民取笑，克勤謂：「講真，當時嗰隻舞其實我係好認真去跳，但就係因為呢隻歌變咗做一件咁好笑嘅事，就令到以為我淨係唱情歌嘅朋友發現，原來佢幾好笑！我想講就係，竟然呢啲嘢係設計，咪順住去囉，有咩所謂啫！