汪明荃連環曬聖誕禮物　楊千嬅繼傳統月餅後今次送啲咩？

聖誕節本是普天同慶開派對交換禮物嘅日子，今年因疫情關係，大家都留家抗疫，不過要送禮總有辨法。每逢大時大節收禮物收到手軟嘅Liza姐汪明荃，收到禮物都會影相放上IG致謝，最近佢都有曬出楊秀惠、王梓軒等人嘅禮物，網友最關心嘅，當然係相當有阿姐心嘅楊千嬅今次送咩呢？

汪阿姐先後曬出多份禮物，包括楊秀惠嘅禮物籃，王梓軒自家品牌兩頂黑色、粉紅色冷帽，Liza姐睇嚟相當鍾意，兩頂一齊戴潮味十足﹗網友大讚阿姐先Carry到﹗而千嬅同丁子高中秋節時送上連鎖餅店傳統白蓮蓉月餅被網友指出手太低，今次聖誕節就送上同集團另一高檔品牌出品嘅貴價食物禮籃，阿姐雙手都差啲抱唔晒，今個聖誕有排食啦。